Urrian zozkatuko dute hirugarren etxebizitza tasatua
Arraguan dago kokatuta, gela bat du eta bigarren eskukoa da. Haren behin behineko prezioa 178.143 eurokoa da. Zozketa urriaren 28an izango da.
Oiartzungo Udalak etxebizitza tasatuen hirugarren zozketa egingo du urrian, eta bertan parte hartzeko eskatzaileen udal erregistroan izena emanda egon behar da hilaren 29a baino lehen.
Zozketak hiru hilero egiten dira, eta urrikoa hirugarrena izango da. Arragua auzoan dago zozkatuko duten etxebizitza, gela bakarra du eta bigarren eskukoa da. Etxabe batean dago, eta ez du ez garajerik ezta trastelekurik ere, eta behin behineko prezioa 178.143 eurokoa da, BEZik gabe.
Parte hartzeko izen ematea HAZ Herritarren Arreta Zerbitzuko bulegoan, egoitza elektronikoan edota inprimaki hau beteta egin behar da. Hala ere, etxebizitza tasatuen eskatzaileek udal erregistroan izena emanda egon behar dute, eta beren lehentasunek zozkatuko den etxebizitzaren ezaugarriekin bat egiten dutenek hartuko dute parte –ikus behean epeak–.
Etxebizitza plan integrala
Legealdia hasi denetik, Oiartzungo Udala etxebizitza plan integral bat diseinatzeko “bere esku dauden eskumen guztiez baliatzen ari da”.
Honakoak dira, besteak beste, udalak landu dituen neurriak.
- Etxebizitza hutsen inbentarioa.
- Alokairurako Bizigune eta ASAP programak.
- Etxebizitza tasatuen salerosketaren eskumena eta kontrola.
- Eredu guztietako etxebizitzak promozio berrietan.
- Erabilera turistikoko etxebizitza mugatzea.
- Tentsio handiko eremu izendapena.
Epeak
- Hilak 29: izen ematea.
- Irailak 30: behin-behineko zerrenda (oiartzun.eus).
- Urriak 9: alegazioak eta lehentasun aldaketak.
- Urriak 20: behin betiko zerrenda (oiartzun.eus).
- Urriak 28: zozketa (Landetxe Kultur Aretoa | 10:00).
- Urriak 28: zozketaren emaitza eta itxarote zerrendaren hurrenkera (oiartzun.eus).
