2027-2028 ikasturtetik aurrera, udal musika eskola martxan
Ibargain musika eskolako eta Soinueneako kideen artean egindako lana izango da proiektu berriaren oinarria. Matrikulazioa udaberrian izango da.
2027-2028 ikasturtetik aurrera udal musika eskola izango du Oiartzunek, eta Ibargain musika eskolako eta Soinueneako kideen artean egindako lana izango da haren oinarria.
Udalak eman du horren berri ohar bidez, eta jakinarazi Ibargain musika eskolako arduradunek zentroa ixteko asmoa adierazi dute, eta, era berean, Soinuenea Fundazioak ere museoan zein ikerketan zentratzeko nahi duela azaldu duela gaineratu dute. Ondorioz, udalak bere egin du herritarrentzat musika irakaskuntzako eskaintza berrantolatzeko ardura.
2025-2026 ikasturtean udal musika eskola berria sortzeko lanak abiatu zituzten, eta proiektuaren oinarriak modu kolektiboan landu zituzten Farapi kooperatibak bideratutako parte hartze prozesu baten bidez.
“Musikaren munduan arituak eta adituak diren hamarnaka herritarrekin aritu da udala, orpoz orpo, hilabeteetan zehar, musika eskolaren zimenduak hausnartzen eta finkatzen. Besteak beste, Ibargain musika eskolako eta Soinueneako hainbat irakaslerekin. Musika eskola desberdinen ereduak aztertu dira, eta musika eskolak arautzen dituen dekretuan oinarrituta proiektu pedagogikoa diseinatu da elkarlan horretatik”, diote.
Ibargainen eta Soinuenearen lana oinarri
Udal eskola berriaren oinarrian Ibargain musika eskolak eta Soinuenearen musika eskolak azken urteetan herriari egindako eskaintza izango da, eta aurreratu dute solfeoa, kantua, pianoa, akordeoia, gitarra, gitarra elektrikoa, baxua, biolina, biolontxeloa, klarinetea, zeharkako txirula, tronpeta, bonbardinoa eta bateria ikasteko aukera izango dela.
Era berean, aipatutako instrumentuez gain instrumentu herrikoiak jotzen ikasteko aukera ere ego dela gehitu dute; hala nola, alboka, txalaparta, txistua, herri perkusioa eta xirolarrua.
Matrikulazio kanpaina, udaberrian
Ikasturte honetan Hezkuntza Sailaren baimena eskuratzeko prozesua amaitu beharko du Oiartzungo Udalak, eta gero irakasle taldea kontratatzeko lehiaketa gauzatuko da. Azkenik, etorkizuneko musika eskola izango den eraikinaren kokapena eta antolaketa aztertuko dituzte. Hots, matrikulazio kanpaina udaberrian izango dela ohartarazi dute.
Eraikin berria martxan egon bitartean, 2027-2028 ikasturtean Elizalde herri eskolan, Haurtzaro ikastolan eta udalaren beste lokal batzuetan emango dituzte musika klaseak.
