Autobusen murrizketen aurka egin du Teo Alberrok
Aldundiak Lurraldebuseko hainbat lineatan aldaketak aurreikusi ditu urriaren 1etik aurrea, eta horietako hiruk Pasaiako mugikortasunari eragiten diote zuzenean.
Pasaiako Udalak bere “kezka eta ezinegona” adierazi dizkio aldundiari Lurraldebuseko hainbat lineatan aurreikusitako aldaketek Pasaiari “larriki” eragingo diotelako eta urriaren 1ean indarrean sartuko direlako.
Aldaketek Pasaiako mugikortasunerako hiru lineari eragiten dietela jakinarazi du udalak: E09aren maiztasun murrizketa, San Pedro eta Donostia lotzen dituena; Donibane eta ospitalearen arteko lotura egiten duen E03aren ibilbidea luzatzea, Errenteria ibilbidean sartuko delako; eta E07ko konexio galera, San Pedro, Antxo eta Donostia artean, intermodalitateari eraginez.
Udalaren arabera, aldaketa horiek “bereziki larriak” dira, kontuan hartuta urtez urte erabiltzaile kopurua handitu duten hiru linea direla, eta horrek “agerian” uzten duelako zerbitzu horien eskaria eta pasaitarren mugikortasunerako garrantzia. Datu ofizialen arabera, 2024tik 2025era bitartean, E03 linearen erabiltzaileen kopurua %10 igo zen, E07koa %17 eta E09koa %4,5.
Testuinguru horretan, Teo Alberro alkateak gutun bat bidali dio Azahara Dominguez Mugikortasun diputatuari, “aurreikusitako murrizketak ez aplikatzeko eta udalak 2024an, aldaketen berri izan zuenean, planteatutako beharrak kontuan hartzeko eskatzeko”.
“Funtsezko” hiru linea
Udalarentzat kezka nagusietako bat San Pedro eta Donostia zuzenean lotzen dituen E09 linea da. Linea horren maiztasuna egungo 15 minututik 20 minutura eta, igandeetan, egungo 20 minututik 30 minutura igaroko da. Alberrorentzat, murrizketa horrek “funtsezko eta lehentasunerako” zerbitzu bat “larriki okertzea” dakar sanpedrotarren eta trintxerpetarren eguneroko mugikortasunerako, “are gehiago kontuan hartuta gaur egun ere eguneko une jakin batzuetan guztiz gainezka dagoen linea bat dela”.
Linea horrez gain, Donibane ospitale eremuarekin lotzen duen linean ere aldaketak daude aurreikusita. Gaur egungo E03k zuzenean lotzen du barrutia Donostia Ospitalearekin, baina emakida berriak Errenteria (Beraun, Pontika, Kaputxinoak, Galtzaraborda, Zentroa, Alaberga…) gehitu nahi du ibilbidera, eta horrek “nabarmen luzatuko du ospitaleetara joan behar duten Donibaneko pertsonen bidaia”.
Alkatearen arabera, “bereziki kezkagarria” da Mugikortasun diputatuak osasun langileek ospitale eremuarekin dituzten loturak hobetuko direla iragartzearekin batera, “paziente, senide edo langile gisa hara joaten direnean joan-etorria oztopatzea”.
Azkenik, Alberrok adierazi du “bereziki kezkagarria” dela E07ren aldaketa, San Pedro Antxorekin lotzeari utzi eta Escalerillasetik pasatzeari utziko baitio, “Pasaiako barrutien arteko funtsezko lotura hautsiz”. Horrez gain, linea horrek Trintxerpe eta San Pedro ETSren eta Antxoko Renferen geltokiekin lotzeko aukera ematen zuela gogorarazi du alkateak, “intermodalitatea erraztuz eta garraiobide desberdinen artean joan-etorriak egin behar dituzten pertsonentzako garraio publikoko alternatiba bat eskainiz”.
“Ez dirudi koherentea aldundiak Pasaiarekiko zor historikoaz hitz egitea, gure udalerriak orografia konplexuaren ondorioei aurre egiteko dituen zailtasunak eta baliabiderik eza onartzea eta, aldi berean, mugikortasunaren oinarrizko beharra planteatzen dugunean, arazoa berea ez dela erantzutea. Pasaia biziberritzeko eta zor historiko hori iraultzeko konpromiso hori benetan badago, gure barrutien eta eskualdearen arteko mugikortasuna eta lotura bermatzeko irtenbide zehatzak ematea ere espero dugu”, adierazi du alkateak.
2024an salatutako murrizketak
Udalaren arabera, aldaketek bereziki eragin diezaiekete adinekoei, mugikortasun urriko pertsonei eta ibilgailu pribaturik ez dutenei. Kasu horietan, alternatibak ibilgailu pribatua izatea edo taxi bat hartzea direla esan du udal erakundeak, “aukera mugatuagoa, garestiagoa eta ingurumenarekiko errespetu gutxiagokoa”.
Bide horretan, Alberrok gogorarazi du 2024an formalki helarazi ziola aldundiari hiru linea horietan aurreikusitako aldaketen aurka zegoela, eta eskatu zuela konexioei eustea, zerbitzuak kentzea saihestea eta ibilbideak ez luzatzea. Aldaketa horiek indarrean sartuko dira orain, eta alkateak berriro helarazi dizkio aldarrikapen horiek Azahara Dominguez diputatuari, “aurreikusitako murrizketak berriz aztertzeko eta Pasaiako mugikortasun beharrak kontuan hartzeko eskatuz gutun batez bidez”.
