Batzar Nagusiek porturako lotura zuzena aztertuko dute, EH Bilduren ekimenez
Koalizioak adierazi du ebazpenean lau hilabete eman zaizkiola aldundiari 2011ko proiektua eguneratzeko eta trafiko astuna Pasaiatik eta Lezotik igaro ez dadin alternatibak aztertzeko.
EH Bilduren ekimenez, Gipuzkoako Batzar Nagusiek aho batez onartu dute aldundiari eskatzea portua ahalmen handiko errepideekin zuzenean lotzeko aukera aztertzeko eta alternatibak bilatzeko, trafiko astunak Pasaiako eta Lezoko hiriguneak zeharkatzen jarrai ez dezan.
Ebazpenean lau hilabeteko epea ezarri zaio aldundiari, eta 2011n aldundiak berak egindako proiektua du oinarri. Proiektu horretan planteatzen dena da Gomistegiko biribilgunea (Aingurarena) GI-20 errepidearekin lurpeko bide baten bidez lotzea, portuko eta herriko trafikoaren nahasketa saihesteko. “Ez gara azpiegitura berri bat asmatzen ari. Aldundiak duela hamabost urte idatzi zuen proiektu bat tiraderatik ateratzea, eguneratzea eta kamioiak gure auzoetatik ateratzeko irtenbidea izan daitekeena aztertzea eskatzen ari gara”, adierazi du Oskar Bordes EH Bilduko batzarkideak.
Honakoa “aldarrikapen historikoa” dela baietsi du koalizioak. 2015ean, Pasaiako Udalak Portuko Plan Bereziari egindako alegazioetan ohartarazi zuen segurtasun, zarata eta trafiko astunarekin lotutako emisioen arazoak zeudela, eta kamioiak hiri bilbetik ateratzeko alternatibak aztertzea eskatu zuen orduko hartan.
EH Bilduk premia hori portuak berriki La Herrerako errepideak itxi eta portuko garita lekuz aldatzearen ondorioz sortutako egoerarekin lotu du; “izan ere, ekintza horrek herritarrentzako mugikortasun aukerak murriztu ditu, eta Euskadi etorbidean eta Gomistegin trafiko presio handiagoa ezarri du”.
“2015ean zein 2024an Pasaiako udal zerbitzuek ohartarazi zutena errealitate da gaur egun Trintxerpe, San Pedro eta Lezoko bizilagunentzat. Portuak sarbide onak behar ditu, baina badiako herriek ere behar dute sarbide horiek haien mugikortasuna eta bizi kalitatea ez baldintzatzea”, adierazi du koalizioak.
Akordioa, urrats garrantzitsua
Lortutako akordioa “urrats garrantzitsua” da EH Bildurentzat, lehen aldiz agindu zehatz bat ezartzen duelako eta epe konkretu bat aldundiari konponbide bat aztertzeko. “Bizilagunek ezin dute beste hamabost urte itxaron”, esan du koalizioak.
EH Bilduk defendatu du konponbideak ahalbidetu behar duela portuko jarduera badiako udalerrien bizitzarekin bateragarri egitea: “Ez dugu portuaren eta hiriaren artean aukeratu nahi. Pasaiako portua modernoa, lehiakorra eta etorkizunekoa izatea nahi dugu; baina, era berean, Pasaia eta Lezo bizigarriak, konektatuak eta seguruak izatea nahi dugu”.
“2011n bazegoen proiektu bat. 2015ean udalak arazoaz ohartarazi zuen. 2024an udal zerbitzuek berriro ohartarazi zuten. Gaur Batzar Nagusiek aho batez eman diote agindua aldundiari. Orain agindutakoa betetzea dagokio. Badiako herritarrei zor zaie”, bukatu du Bordesek.
