Jaizkibelgo Igoerak eragina izango du trafikoan
Lasterketak igandean jokatuko dira, eta Jaizkibelera doan GI-3440 errepidea itxita egongo da lehiaketak irauten duen bitartean.
Escuderia Jaizkibelek antolatuta, asteburuan Jaizkibelgo Igoeraren 48. ekitaldia jokatuko da. Lasterketak igandean (hilaren 20an) izango dira, 08:30etik aurrera, Jaizkibelera doan GI-3440 errepideko zati batean. Probak, hortaz, eragina izango du eremu horretako trafikoan.
Jaizkibelera doan GI-3440 errepidea itxita egongo da lehiaketak irauten duen bitartean, parte hartzaileen eta ikusleen segurtasuna bermatzeko eta lasterketa txandak egin ahal izateko. Zirkulazioa lasterketak bukatu ondoren eta segurtasun baldintzak bermatuta daudenean berrezarriko da. Lezo eta Donibane arteko errepidea ez da itxiko eta ibilgailuek zirkulatzen jarraitu ahal izango dute.
Igoeran parte hartuko duten ibilgailuen laguntza parkeak Nabalaldean kokatuko dira. Igande goizeko lehen orduetan balizatuta eta jarduera horretarako erreserbatua egongo da espazioa. Hori dela eta, industrialdearen barrualdean murrizketak ezarriko dira bertatik ibiltzeko eta aparkatzeko. Industrialdeko garajeetarako sarbidea, aldiz, bermatua egongo da.
Lasterketa bukatutakoan, sari banaketa ekitaldia egingo da Pasaiako portuaren eremuan.
