Motor orroek Jaizkibel hartuko dute
Escuderia Jaizkibelek antolatuta, asteburuan Jaizkibelgo Igoeraren 48. ekitaldia jokatuko da. Bihar ibilgailuak ikusgai egongo dira Errenteria-Oreretako Touring hiribidean. Etzi lasterketen txanda, 08:30etik aurrera.
Motorraren zaleak zorioneko daude, asteburuan (hilaren 19an eta 20an) Jaizkibelgo Igoeraren 48. ekitaldia jokatuko baita Oarso Bidasoko errepideetan. Jaizkibelgo probak sona handia du motorraren munduko egutegian, historikoa da, eta maila handiko gidariak bilduko ditu aurten ere. Oscar Ruiperez Cabello errenteriarra da Jaizkibelgo Igoeraren antolatzaileetako bat, eta gogotsu da lasterketaren atarian. Harekin izan da HITZA.
Jaizkibelgo Igoera Escuderia Jaizkibelek antolatzen du, RAC Vasco Navarroren laguntzarekin. Bi eragileek Euskadiko eta Gipuzkoako Automobilismo Federazioen babesa ere badute proba antolatzeko. Lasterketak 5,5 kilometroko luzera du, eta GI-3440 errepidean lehiatzen da, Lezo, Donibane, Hondarribia eta Jaizkibelgo gaina lotzen dituen asfaltoan. Jaizkibelgoa mendiko proba bat da, eta puntuagarria Euskal Herriko eta Gipuzkoako mendi txapelketetarako.
Motor hotsak bihar eta etzi (larunbatean eta igandean) entzun ahal izango dira nonahi. Bihar igoeran izango diren 70 ibilgailuen egiaztapen teknikoak egingo dira Errenteria-Oreretako Touring hiribidean, Touring Kirol Elkartearen futbol zelaitik aurrerako zatian. Ruiperez bera arduratuko da ibilgailu parte hartzaileen IATa pasatzeaz, bere egitekoa baita autoen segurtasun neurriak egiaztatzea eta ibilgailuen datuak eta informazioa betetzen direla bermatzea. Egiaztapen teknikoak pasatzeaz gain, Jaizkibelgo Igoeran arituko diren ibilgailu guztiak ikusgai egongo dira Touring hiribidean, 16:20etik 19:00etara bitartean. Edonork bisitatu ahal izango ditu auto parte hartzaileak.
Egiaztapen teknikoak eginda, ibilgailuen motorrak igandean piztuko dira, Jaizkibel motorraren epizentro bihurtzeko. 08:30ean entrenamendu libreak egingo dituzte gidariek, eta horien ondoren izango dira entrenamendu ofizialak. Prestaketa lanak eginda, lasterketak jokatuko dira, bi txandatan. Ondo bidean, lehiaketak 14:00 eta 14:30 artean bukatzea aurreikusi dute sustatzaileek. Zaleek, hortaz, motor orroz betetako goiz oso batez gozatu ahal izango dute.
Autoen motorrak itzali ondoren, sari banaketa ekitaldia egingo da Pasaiako portuan, 15:30ean. Ekitaldia badiaren erdi-erdian egingo da, Donibaneko aldean. Gidariak bi txandatan atera beharko dira denborek balioa izateko, eta denbora onena egiten duena gailenduko da Jaizkibelgo Igoeraren 48. edizioan. 70 parte hartzaileak Arkaitz Ordoki eta Bruno Scherer gidarien lekukoa hartzen ahaleginduko dira, pilotu horiek izan baitziren 2025eko irabazleak. Antolatzaileek maila handiko gidariak espero dituzte aurten ere, eta Europako Txapelketak lehiatzen ari diren gidariak lehiatuko dira Jaizkibelen. Maila aparta izango bada ere, Ruiperezek pena du Joseba Iraola pilotua ez delako irteeran izango. Iraolak zazpitan irabazi du Jaizkibelgo Igoera, eta harena da probako errekorra.
Boluntarioen lana
Agerikoa ikaragarria izan arren, tamaina honetako proba bat ez da ezerezetik sortzen, lan handia baitago atzean hura egikaritzeko. Antolatzaileak azken ukituekin ari dira orain, asteburuan dena prest izateko. Lasterketaren egunean 100 boluntario inguru biltzen dira. Haiek gabe lasterketa egitea ezinezkoa litzatekeela aitortu du Ruiperezek. Babesle eta laguntzaileentzat ere esker oneko hitzak izan ditu antolatzaileak. Boluntario horien lana aitortzeko, lasterketaren egunean jana eta edaria ematen dizkiete, baita detaile bat ere. Iaz, adibidez, Jaizkibelgo Igoeraren motxila bat eman zieten kolaboratzaileei. Urte bukaeran, gainera, afari bat egiten dute denek lan hori errekonozitzeko.
Astebururako eguraldi ona dago iragarria, eta Ruiperezek motorraren zaleei Jaizkibelera gerturatzeko deia luzatu die. Ikusle horiei bi mezu argi helarazi nahi izan dizkie antolatzaileak: inguruak garbi manten ditzatela eta lasterketak gaitutako eremuetan ikustea, arriskuak saihesteko.
