Gipuzkoako albokak elkartuko dira bosgarrenez Landetxen
Urriaren 3an izango da topaketa, eta kontzertuaren ondotik bazkari herrikoia egingo dute. Zazpi alboka izango dira emanaldiko protagonista.
Soinueneak antolatuta, Gipuzkoako V. Alboka Topaketa egingo dute Oiartzunen urriaren 3an (larunbata da). Soinueneak Euskal Herriko zenbait museo eta bilduma partikularrekin garatu duen lankidetzari esker, hitzorduan XIX. mende bukaerako eta XX. mende hasierako zazpi alboka izango dira protagonista. Horien zaharberritze lanak Juan Mari Beltran eta Julen Begoña albokagileek egin dituzte.
Honakoak izango dira aspaldiko albokak joko dituzten albokariak: Juan Mari Beltran, Teresa Jareño, Julen Begoña, Fede de Dios eta Amaia Fuentes.
Hitzordua 12:00etan izango da, Landetxen, eta sarrerak erosi behar dira aldez aurretik zortzi euroren truke. Gero, 14:30ean, bazkari herrikoia egingo dute Kontzejupean, eta horretarako izena eman behar da esteka honetara idatzita –helduen prezioa 25 eurokoa da, eta haurrena, berriz, 15 eurokoa–.
