'Loturak askatzera!' lelopean ekitaldia egingo du Sortuk igandean
Hilaren 27an 51 urte beteko dira erregimen frankistak Txiki eta Otaegi erail zituenetik. 12:00etan izango da hitzordua, Arizmendienean.
Maialen Kortabarria eta Xabi Iraola Sortuko kideak.@sortuEH / X Igandean (hilak 27) 51 urte beteko dira erregimen frankistak Txiki eta Otaegi militante independentistak erail zituenetik. Hargatik, ekitaldiak antolatu ditu Sortuk Euskal Herriko dozenaka herritan; tartean, Oiartzunen. Arizmendienean izango da Loturak askatzera! lelopean egingo duten hitzordua, Sorturen aburuz askapen prozesua une erabakigarri batean baitago, eta 78ko erregimenean lotuta gelditu ziren korapiloak askatzeko aukerak baitaude: “Euskal Herrian potentzial politiko izugarria daukan fase politikoa zabaltzea lortu dugu. Eta orain askapen prozesuaren egoera berrietan murgiltzeko baldintzak ereitea dagokigu”.
Igandekoa Txiki eta Otaegi oroitzeko eguna da Sorturentzat, baina memoriarako eguna izateaz gain, askapen borrokan berresteko eta etorkizunera begiratzeko eguna ere badela nabarmendu dute: “Urtero oroimenez eta aldarrikapenez bete eta harrotasunez bizi dugu egun hau, eta nazio askapen mugimenduaren eguna bilakatzen ari da”, diote.
Txikiren eta Otaegiren fusilamenduen urteurrena zenbait kide eta belaunaldi elkartzen dituen eguna da Sorturentzat: “Euskal Herriaren alde borrokan ari zen, ari den eta haren askatasuna lortu arte borrokan ariko den komunitatea izateak batzen gaitu hilaren 27an. Nazio askapen mugimendua zerbait bada borroka komunitate bat delako”, gaineratu dute.
Urte bakoitzean artista bati eskatzen diote hilaren 27a irudikatzeko eskaria, eta aurtengoan Mikel Erkiaga bilbotarraren txanda izan da.
