Ikasturte berrirako jarduera sorta zabala, erretiratu eta pentsiodunen elkarteetan
Erretiratuen elkarteek 3.400 bazkidetik gora dituzte, eta antolatzen duten programazioari esker langa hori gainditu eta adineko gehiagorengana iristen dira.
Erretiratu eta pentsiodunen elkarteetako ordezkarien agerraldia. Erretiroa hartu badute ere, ez dira erretiratu eta aktibo mantentzearen aldeko apustua egiten dute asko-askok. Horretarako bide bat, erretiratu eta pentsiodunen elkarteetan antolatutako jarduerak dira. Gaur aurkeztu dituzte Olibeteko egoitzan ikasturte berrirako ondu dituztenak Aizpea Otaegi alkateak eta Naroa Zabala Gizarte Zerbitzuetako zinegotziak lagunduta. Horietan arlo fisikoa, kognitiboa, eta sorkuntza ere lantzen dituzte: indarra, mugimendua, oreka… Gimnasia, pilates, yoga, tai ji, aerobika, luzaketak, aretoko dantzak, sevillanak, eta euskal dantza, besteak beste.
Arlo kognitiboa lantzeko berriz, memoria, xake, edota euskara eskolak eskainiko dituzte. Sorkuntza arloan berriz, esku lanak eta bestelako diziplinak landuko dituzte: antzerkia, ehoziri lana, joskintza, marrazketa, pintura, patchwork, eta eskulanak. Informatika eta eskuko telefonoen gaineko ikastaroak ere antolatu dituzte.
Horiek tailerrak, baina ez dira antolatzen dituzten bakarrak, izan ere, mendi irteerak, hitzaldiak edota txapelketak ere antolatu dituzte aurten ere. Horrekin batera auzoetako jaietan ekarpena egiten dute.
Izena emateko epea zabalik dago jada eta interesdunek elkarteetara jo beharko dute. Urte osoan izango dira zabalik, plazak dauden kasuetan.
Ikasturtea datorren astean hasi eta maiatzera arte izango da zabalik Errenteria-Oreretako zortzi erretiratu eta pentsiodunen elkartetan: San Agustin, Arramendipe, Bienvenido, Laguntasuna, El Parque, San Jose, Beti Bizkor eta La Magdalenak.
Alkatearen esker ona
Aizpea Otaegi alkateak esker ona adierazi die elkarte horiei urtero-urtero egiten duten lanarengatik, eta hura aitortu, “sozializaziorako eta elkar topaketarako gune garrantzitsu bihurtzen dira. Jarduera hauek, aisialdirako eskaintza izateaz harago, hautatua ez den bakardadeari aurre egiteko espazioak ere badira”.
Zortzi erretiratu elkarteen artean ehun jardueratik gora eskainiko dituzte, eta horietan, 1.700 pertsona inguruk hartuko du parte. Jarduera horietaz gain, erretiratuek eurek egindako eskaeretatik sortutako beste jarduera batzuk ere gehituko dira. Besteak beste, ibilaldi osasungarriak, irakurketa erraza, kafe solasaldiak… izango dira.
Agerraldia biribiltzeko, Iztieta auzoko Eguzki abesbatzak kantu bat eskaini du, partaideek sortua, adinekoen gizartean parte hartzeko eskubidea aldarrikatuz eta egiten duten ekarpena aitortuz.
Elkarte bakoitzeko jarduerak kontsultatzeko, egin klik hemen.
