Mugikortasun jasangarria erdigunean
Hainbat jarduera antolatu ditu udalak aste honetan barrena , Europako Mugikortasun Jasangarriaren Astearekin bat eginda.
Hilaren 25ean egingo dute Zumardian bizikleta azoka.Herri Bizia Europako Mugikortasun Jasangarriaren Astearekin bat egin du Errenteriako Udalak aurten ere, eta hori horrela, hainbat jarduera antolatu ditu ase osoan zehar: bigarren eskuko bizikleta azoka, trebetasun jokoak, birziklatze tailerra txirrindularitza materialekin, eta erakusketa.
Erakusketa zabalik da eta hilaren 26ra arte, larunbata, bisitatu ahalko da Lekuona Fabrikaren sarreran, doan. Bizikleta piezak birziklatzeko moduak erakusten ditu. Bigarren eskuko bizikleten azoka, berriz, ostiralean, hilaren 25ean, egingo dute Gamon Zumardian 16:30etik 20:00etara.
Egun berean 17:00etatik 20:00etara eta Agirre Lehendakariaren plazan, tailerrak eta trebetasun jolasak antolatu dituzte. Kasu honetan, Laguntasuna Txirrindularitza elkartea, eta OTXEren eskutik, familiei begirako telazko zorroak margotzeko tailerra egingo dute. Bestalde, trebetasun zirkuitua izango da 12 urte arteko haurrentzat; bakoitzak bere bizikleta eraman beharko du.
Europako Batzordeak azken urte hauetan pertsona guztiek garraio jasangarri, eskuragarri, inklusibo eta seguru bat izateko aukera ematen duen gizarte baten alde egiten duen leloa baliatu du, garraio publikoa, oinez ibiltzea eta bizikletaz ibiltzea gizartearentzako aukera bideragarriak izan daitezen bermatuz. Errenteriako Udalak bere egin du helburu hori, urteak daramatzala ildo horretan lanean dio, “eta garraiobide iraunkorragoak erabiltzeak dakartzan onurak gogorarazten ditu, hala nola garraio publikoa eta oinezko joan-etorriak; gainera, ibilgailu pribatuaren erabilera irrazionalak hirian osasun publikoan eta ingurumenean dituen ondorio negatiboei buruz sentsibilizatzen du”.
