Atxilotu bat Oiartzunen adingabe bat prostituitzea leporatuta
Aste honetan atxilotu dute 32 urteko emakumea, eta baita 43 urteko gizonezko bat ere, Donostian. Ikerketa abuztuan abiatu zuten.
Oiartzungo Doneztebe plaza, artxiboko irudi batean. 43 urteko gizon bat eta 32 urteko emakume bat atxilotu ditu aste honetan Ertzaintzak adingabe bat prostituitzea leporatuta. Gizona Donostian atxilotu dute, eta emakumea, aldiz, Oiartzunen, eta epaileak biak behin behinean espetxeratzeko agindua eman du.
Eusko Jaurlaritzaren Segurtasun Sailak jakitera eman duenaren arabera, Hernaniko Ertzain etxearen ikerketa baten ondorioz atxilotu dituzte biak “haien ahaidetasun harreman bat duen adingabe bat ustez prostituitzea” leporatuta.
Ikerketa joan den abuztuan abiatu zuten Ertzaintzak Lasarte-Orian adingabe batek jasandako sexu eraso baten berri izaten zutenean. Une horretan Hernaniko Ertzain etxeko agenteek 57 urteko gizon bat atxilotu zuten.
Kasu horretaz arduratu ziren ertzainek nabarmendu dutenez, ez zen adingabe horrekin gertatzen zen lehen aldia; hots, gehitu dute “diru ordainketak” adostu zituztela “sexu topaketen truke”. Diotenez, topaketa horiek adingabearen bi familiartekok antolatzen zituzten, eta “haiek errazten zituzten kontaktuak eta haietako batek eramaten zuen adingabea haren ibilgailuan”.
Elkarretaratzea bihar
Oiartzungo Feministen Asanbladak deituta, elkarretaratzea egingo dute bihar (hilak 25, ostirala), Doneztebe plazan. 18:30ean elkartuko dira gertakaria salatzeko.
“Aski da, nazkatuta gaude!”, diote.
