Martuzenegi mendiko egur ustiaketak esleitzeko lehiaketa ireki dute
Bost hektareako eremua da ustiatu behar dena, eta horretarako 23.595 euroko aurrekontua dago. Proposamenak hilaren 29a baino lehen aurkeztu behar dira.
Oiartzungo Udalak jakinarazi duenez, onura publikoa duen Martuzenegi mendiko 65, 47 eta 63 unaden zatietako egur ustiaketak eta ondorengo landaketetarako prestaketa lehiaketa irekita dago.
Azaldu dutenez, bost hektareako eremua da ustiatu behar dena, eta haritz amerikarra dagoela bertan diote, ia 600 ale, zehazki. “Horiek hondotik kendu eta ondoren bertako espezie bat landatzeko prestaketa lanak dira egin beharrekok”, diote.
Jarduera horretarako 23.595 euroko aurrekontua dago, eta egur ustiaketa lanak 2027ko martxoaren 31rako bukatu behar dira. Landaketarako prestaketa lanak, berriz, 2027ko ekainaren 30erako amaitu behar dira.
Erregistratzeko epea, hilaren 29 arte
Hori horrela, proposamenak erregistratzeko epea hilaren 29an amaituko da, eta eskaintzak egoitza elektronikoaren bitartez edota HAZ bulegoan aurkeztu behar dira –esteka honetan dago informazio gehiago–.
Oiartzunek 6.000 hektarea ditu eta 3.000tik gora dira udalarenak, nahiz eta kudeaketa ez den bere esku egon orain dela gutxira arte. “Azken hamarkadetan berreskuratu du udalak eskumen hori, eta Gipuzkoako Foru Aldundiarekin batera bertako basoa berreskuratzeko lanean dihardu, ondarea eta babestea helburu”, diote.
Azkenik, kontatu dute espezie exotikoen landaketek 1.143 hektarea estaltzen dituztela Oiartzungo herri-mendietan, azalera osoaren %38, hain justu. Horregatik, nabarmendu dute esku hartzeek neurri txikikoak izan behar dutela, mendien ezaugarriek ez dutelako beste aukerarik ematen.
“Mendiak markatutako erritmoak baina etenik gabe jardutea da Oiartzungo Udalaren asmoa”, amaitu dute.
