Elkarteentzako formakuntzak martxan dira bigarrenez
Aldundiak eta udalak lau orduko lau ikastaro antolatu dituzte elkarte eta herritar taldeentzat, urritik abendura bitartean. Izen emateak irekita daude.
Pasaiako Udalak herriko elkarte eta herritar taldeei begirako formakuntzen bigarren edizioa jarri du martxan. Urria eta abendua bitartean, lau orduko lau ikastaro izango dituzte eskuragarri. Honakoa da 2026an egiten den bigarren ekitaldia. Orain eskainiko diren bi ikastaro, gainera, 2025ean ere egin ziren, eta harrera ona izan ondoren, eguneratuta eskainiko dira berriz. Horrez gain, elkarteek adierazitako beharretatik abiatuta, bi ikastaro berri eskainiko dira urteko azken hiruhilekoan.
Honakoak dira eskainiko diren ikastaroak:
- Talde eraginkorrak. Urriaren 7an eta 14an, asteazkenak, 18:00etatik 20:00etara, San Pedroko Udal Aretoan.
- Administrazio eta kontabilitate oinarriak. Urriaren 26an eta azaroaren 2an, astelehenak, 18:00etatik 20:00etara, Trintxerpeko Alkateordetzan.
- Taldeen lana errazteko konponbide digitalak. Azaroaren 24an eta abenduaren 1ean, astearteak, 18:00etatik 20:00etara, Donibaneko Topagune Gelan.
- Komunikazio eraginkorra: kartel erakargarri bat nola egin? Azaroaren 16an eta 23an, astelehenak, 18:00etatik 20:00etara, Antxoko Kultur Etxean.
Ikastaro guztiak doakoak dira, eta izen emateak irekita daude jada. Izen emateak bi modutara egin daitezke: udal webguneko galdetegia betez edo posta elektronikora mezua idatziz. Galderak eta zalantzak ere mezu elektronikoaren bidez formula daitezke.
Ikastaroak egin ahal izateko, gutxienez hamar pertsona bildu beharko dira. Kopuru horretara iritzi ezean, ez da ikastaroa antolatuko.
Saioak Gipuzkoako Foru Aldundiko Gobernu Oneko eta Berrikuntza Politiko-sozialeko Sailak eta Pasaiako Udalak antolatu dituzte elkarlanean, eta udalak herritar eta erakunde guztiak animatu ditu parte hartzera.
Ikastaroak
- Talde eraginkorrak. Antolaketaren eraginkortasunari eta egunerokotasunean aplikatzeko tresna erabilgarriei buruzko saio praktikoa da. Proiektuen plangintzarako eta jarraipenerako hainbat eredu eta tresna hartuko dira kontuan, tartean funtsezkoak diren bi alderdiri buruz: bilera eraginkorrak eta denboraren kudeaketa.
- Administrazio eta kontabilitate oinarriak. Irabazi asmorik gabeko erakunde baten lege esparrua ulertzeko saio teoriko-praktikoa da. Kontabilitate esparrua ezagutu, ulertu eta kontuan hartu beharreko elementuak landuko dira, parte hartzaileek beren kasuak partekatu eta eguneroko kudeaketa erraztuko duten trikimailuak, tresnak eta programak ezagutuz.
- Taldeen lana errazteko konponbide digitalak. Elkarteen beharretara egokitutako irtenbide digitalak ezagutarazteko ikastaroa da, egunerokoan funtsezko alderdiak hobetzeko tailer praktiko batzuen bidez, hala nola: komunikazioa, barne antolaketa eta proiektuen kudeaketarekin lotutakoak. Mugikor edota ordenagailu baten laguntzaz zenbait tresna ezagutu eta praktikan jarriko dira.
- Komunikazio eraginkorra: kartel erakargarri bat nola egin? Elkarte eta eragileek beraien egitasmoak herritarren artean zabaltzeko, ezagutarazteko eta parte hartzera animatzeko ezinbestekoa da komunikazio bide eraginkorrak baliatzea. Ikastaro honetan, egitasmo zehatzetarako sortzen diren kartelei erreparatuko zaie: erakargarri egiteko ezaugarriak, interneterako baliabideak edota diseinurako irizpideak.
