Erabilerari arnas emateko ezinbesteko espazioak
Aurten ere martxan jarriko du Lau Haizetara Euskaltzaleon Topaguneak Mintzalaguna programa; euskara eroso erabiltzeko, galdutako jarioa berreskuratzeko eta lotsa galtzeko ezinbesteko espazioa eskaintzen du programak.
Ximun Leturia Lete, Mintzalaguna pprogramaren koordinatzailea Euskararen ezagutza behar-beharrezkoa da hizkuntza galduko ez bada, baina ezer gutxirako balio du bere horretan erabiltzen ez bada; eta erabiltzeko espazioak, arnasguneak ezinbesteko dira. Lan horretan, euskararentzat arnasguneak eraiki eta elikatzen ari da Lau Haizetara Euskaltzaleon Topagunea, eta horietako bat Mintzalaguna proiektua da.
Aurtengoarekin 25 urte beteko ditu Mintzalaguna programak Errenteria-Oreretako euskalgintza elkarteak abian jarri zuenetik; 2001ean izan zen hori. Ordutik euskaraz bizi nahi eta horren aldeko apustua egin duten makina bat herritar arrimatu da mintzalaguntzaileen aterkipera zekien hura freskatu, lehen elkarrizketa hasi eta buka euskaraz egiteko beharrezkoa zuen ausardia bildu, edota lotsa galtzeko espazio seguru baten bila. Aurten ere eskainiko die aukera euskaraz eroso, norbere erritmoan eta gune seguru eta lasaian aritu nahi dutenei Lau Haizetarak. Matrikula epea zabalik da jada, eta parte hartu nahi dutenek bi baldintza baino ez dituzte bete behar: euskaraz elkarrizketa bat izateko gaitasuna izan, eta astean behin ordubeteko saioetan parte hartzeko konpromisoa mantentzea ikasturtean zehar: «Mintzalaguna programan parte hartzea doakoa da, eta parte hartu nahi dutenen ordutegira moldatzen saiatzen gara, taldeak goizez zein arratsaldez izaten dira», azaldu du Ximun Leturia Lete programaren arduradunak.
Urrian egingo ditu euskara elkarteak taldekatzeak, baina nabarmen jarri du Leturiak izen emate ofiziala orain zabaldu bada ere, ikasturte osoan zehar dagoela aukera programarekin bat egiteko. Horretarako 613 25 49 04 telefono zenbakira deitu behar dute interesdunek, QR kodea baliatu galdetegia betetzeko, bulegoa@lahaizetara.eus posta elektronikora mezua bidali, edota Lau Haizetara Euskaltzaleon Topagunearen egoitzara joan —Joxepa Antoni Aranberri anitzenea— astearte eta ostegunetan 18:00etatik 20:00etara.
70 mintzalagun eta 13 talde
Joan den ikasturteko datuen berri eman du Leturiak: «70 mintzalagun eta 13 talde izan genituen iaz denera». Horien profila ere izan du mintzagai Lau Hazietarako ordezkariak, «emakumeak izaten dira gehienak, 40 urtetik gorakoak». Euskararekin urrats bat aurrera egin nahi dutenei deia Mintzalaguna proiektuaren arduradunak: «Euskara ikasten ari direnei, edota urteak euskara erabili gabe izan eta orain berreskuratu nahi dutenek ere lekua dute gurean».
Mintzalagunei deia, baina baita mintzalaguntzaileei ere, asteroko ordubeteko saio horietan gidari aritzen direnen beharra baitu programak, «euskara jakin eta euskaraz bizi nahi duten horiei erremintak eskura jartzeko gogoa baino ez dute behar».
