Portu eremuak lagatzeko protokoloa betetzeko eskatu du PSE-EEk
Alderdi sozialistak mozio bat aurkeztu du osoko bilkuran eztabaidatu eta onartzeko.
Pasaiako PSE-EEk mozio bat aurkeztu du osoko bilkuran eztabaidatu eta onartzeko. Mozio horretan, Pasaiako Portu Agintaritzarekin (PPA) sinatutako Jarduera eta Asmoen Protokolo Orokorra osorik eta besterik gabe betetzea eskatu du alderdi sozialistak, portu espazioak herriari doan lagatzeko.
2019an adostutako Esparru Protokoloak udal zerbitzuetarako espazio eta lurzati neuralgikoen erabilera eta integrazioa Pasaiako Udalari doan lagatzea aurreikusten zuela jakinarazi du PSE-EEk: Trintxerpeko topoaren sarbideak, Herrera mendebaldeko biltegien estalkia, alkateordetza eta Trintxerpeko merkatua, Gernika plaza, Ziriza etxea, Donibaneko Kulturgunea eta Bizkaia plaza.
Alderdi sozialistak adierazi du “portuko jabari publikoarekin izandako bizikidetzaren ondorioz urteetan zortasun historikoa” izan ondoren, pasaitarrak “zain” daudela “hiri berroneratzeko, mugikortasunerako eta barruti guztietako bizi kalitatea hobetzeko akordio erabakigarri bat gauzatzeko”.
Garraio eta Mugikortasun Iraunkorreko Ministerioak Legebiltzarrean egindako galdera bati erantzunez adierazi zuenez, “desafektazio espedienteak izapidetze aurreratuan zeuden, Espainiako Gobernuari dagokionez”. “Beraz, argi dago PPAk ez duela benetako aurrerapenik egin, eta udalerria erregimen iragankor iraunkor baten mende jartzen duela”, zehaztu du PSE-EEk.
“Paralisi horrek behin betiko udal inbertsioak eta espazio publikoaren erabateko kudeaketa zailtzeaz gain”, “egoera onartezinak” sortzen dituela baietsi du alderdi sozialistak, hala nola, udal funtsekin eraikitako Donibaneko Kulturgunea automatikoki PPAren esku uzteko arriskua.
Erreakzioa premiazkoa
PSE-EEren arabera, “premiazkoa” da “ekintza ezaren aurrean erreakzionatzea”: “Ezin dugu onartu Pasaiak balaztatuta jarraitzea, erabakitasun faltagatik. Gure udalerriaren eraldaketaren buru izateak pasaitarren interesak defendatzea eta hartutako konpromisoak zorrotz betetzea eskatzen du. Premiazkoa da Pasaiako hiri ingurunea behingoz eraldatzea eta herritarrei dagokien espazioa itzultzea”.
Horregatik erregistratu du mozioa alderdi sozialistak, PPAri eskatzeko protokoloa osorik betetzeko falta diren espedienteak azkartzeko. “Horren arabera, legegintzaldi hau bukatu aurretik juridikoki bermatu behar da gune horiek guztiak udalaren jabari publikokoak eta doakoak direla, eta alkateari eskatzen zaio Jarraipen Batzorde Mistoaren premiazko deialdia egitea, lurzati bakoitzeko epe zehatzekin itxitako egikaritze egutegia finkatzeko”.
