Hekoa, Oarsoaldeko dirua jaio da
Eskualdeko establezimenduekin ari dira lanean hekoa erabiltzeko. Diruaren iruditeria edota billeteen xehetasunak aurkeztu dituzte gaur.
Bada denbora bat Oarsoaldean tokiko moneta bat izango zela sortu zen kontua, eta egia bilakatu da orain. Izan ere, heko monetaren izena eta billeteen diseinua aurkeztu dituzte gaur Elizondon. Hitzorduan billeteen lehen prototipoa erakutsi dute, baina elkartearen batzar orokorra ere egin dute. Bertan, gainera, funtzionamendurako oinarriak eta lehendakaritza bikoitza onartu dituzte; tartean da Aitziber Arnaiz Garmendia oiartzuarra.
Heko izena jarri diote monetari, eta, besteak beste, hegoaldeko, herriz herriko ekonomia edota ekologia terminoekin lotu daitekeela diote. Hots, argitu dute Gabonetan izango dela erabilgarri.
Moneta martxan jartzeko prozesu horretan, elkarlan “estua” izan dutela jakinarazi dute Eusko Monetako kideekin.
Gauza berria da oraindik hekoa, baina zenbait xehetasun eman dituzte gaurkoan, esaterako, ordaintzeko moduetako bat billete fisikoak erabiltzea izango dela, eta horretarako 1, 2, 5, 10, 20 eta 50 heko-ko billeteen diseinua lantzen ari direla aurreratu dute.
Iruditeria zein izango zen erabakitzeko galdetegi bat egin zuten uztailean, eta bertatik honako ondorioak atera zituzten: euskal lurraldea, ohitura eta paisaien aniztasuna jasotzea, hirigune zein landa guneak erakustea, pertsona zehatzen irudirik ez erabiltzea… Gaurko aurkezpenean billete baten prototipoa aurkeztu dute, eta datozen asteetan billeteen behin betiko diseinuak aurkeztuko dituztela aurreratu dute.
Nola ordaindu heko-arekin
Hekoaren dinamizatzaileak Baztango zein Oarsoaldeko establezimenduekin ari dira dagoeneko lanean, eta oraingoz 40tik gora dira harekin bat egin dutenak.
Aipatutakoaz gain, hekoekin ordaintzeko hiru modu daudela nabarmendu dute; batetik, arestian aipatutako billete fisikoak erabiliz, eta, bestetik, Hekoplay aplikazioarekin zein QR bat daukan txartel fisikoarekin.
Dena den, diote hekoa erabiltzeko beharrezkoa dela elkarteko bazkide izatea, eta bazkideek beraien euroak hekoengatik trukatu beharko dituztela horretarako ahalbidetuko dituzten guneetan. Heko batek euro baten balioa izango du.
