Zein izan dira oiartzuarren asteburuko emaitzak?
Hona hemen Oiartzun Kirol Elkarteko jokalarien partidak. Ostegunean guraso bilerara joateko deia luzatu du zuzendaritza taldeak.
Hara eta hona ibili dira asteburuan Oiartzun Kirol Elkartea osatzen duten jokalariak, Euskal Herriko hamaika txokotan izan baitituzte norgehiagokak. Zehatzagoak izate aldera, hemezortzi partida jokatu dituzte, eta denetariko emaitzak lortu dituzte, partida batzuk irabazi, beste batzuk galdu, eta bizpahiru partida berdindu ere egin baitituzte.
Jarraian, klubak HITZAri helarazi dizkion zenbait kronika, emaitzak eta baita irudiak ere.
3 RFEF: Athletic 1 – 0 OKE
Oiartzun Kirol Elkarteak hedabideari azaldu dionaren arabera, partidan “ondo” sartu ziren hasieran, “planteamendu argi batekin, eta esandakoa aurrera eramanez”. Ahal zutenetan “presio handia” egin zutela diote, eta gainontzeko jokaldietan aurkarien akatsak baliatuz kontraerasora atera zirela.
Partida aurreikusi bezala zihoala ere nabarmendu dute, harik eta Athleticek gola sartu zuen arte 30. minutuan.
Bigarren zatian hasierako planteamendu berarekin jarraitu zuten, eta diote “partidu parekatu bat” ikusten zela. Azkenik, azken minutuetan presioa areagotzen saiatu ziren, baina oiartzuarrek ez zuten lortu aurkarien zelaian “behar adina min” egitea.
Hirugarren maila: Areto futbola OKE 6 – 8 Tolosa
Oiartzun taldeak ezin izan zuen punturik eskuratu Elorsoron Tolosalaren aurka jokatutako estatuko hirugarren mailako ligako lehen partidan. Aurkariak zazpigarren minutuan aurreratu ziren, baina laster batean berdinketa lortu zuten etxekoek Oier Cousillasen golarekin. Haatik, Tolosakoak aurreratu, eta hurrengo minutuetan hiru gol sartu zituzten markagailua 1-4 jarriz.
Bigarren zatian ere aurkariak aurreratu ziren beste gol batekin, eta gero Luken Vicentek egin zuen oiartzuarren bigarren gola. Une horretan hasi zen oiartzuarren erreakzioa, eta bost minutuan lau gol sartzea lortu zuten; egileak Mikel Mancisidor, Xabier Oiarbide, Jon Sistiaga eta Vicente izan ziren.
Azken minutuetan partida “asko” ireki zela kontatu dute gero, eta bi taldeek aukera argiak izan bazituzten ere Tolosaskoek hartu zuten aurre, eta beste bi gol sartu zituzten. 6-8 amaitu zen partida.
Ohorezko erregionala: OKE 3 – 0 Elgoibar
Kontatu dutenez, partida ez zen guztiz eroso hasi, eta lehen minutuetan aurkariak oiartzuarren atezaindegitik gertu egon ziren. Hala ere, jokaldi aislatu batean penalti bati esker etxekoak aurreratu eta konfiantza lortu zuten.
Gero gehitu dute hurrengo minutuetan ez zela “gauza handirik pasa”, baina bigarren zatiaren erdialdean beste bi gol sartu zituzten.
Hona hemen klubeko emaitza guztiak, zerrendatuta.
- Infantil handia 0 – 3 Real Sociedad.
- Ohorezko erregionala neskak 3 – 3. Elgoibar.
- Kadete B 1 -3. Dunboa eguzki.
- Infantil F11 1 – 4 Touring.
- Kadete B neskak 1 – 0 Mariño real union.
- Jubenil preferente 3 – 0 Hondarribia.
- 1 infantila. 2 – +5 Landetxa.
- Ohorezko kadete neskak 1 – 1 Intxaudi.
- Pasaia 2 – 3 Lehenengo erregionala.
- Deusto 1 – 3 Jubenil baska.
- Inter 2 – 2 Jubenil C.
- Mariño 2 – 3 Jubenil D.
- Martutene 2 – 0 Ohorezko kadetea.
- Pasaia 4 – 0 Kadete C.
- Kostkas 5+ – 0 Infantil txikia.
Guraso bilera, urriaren 1ean
Denboraldi berriarekin batera, Oiartzun Kirol Elkarteko zuzendaritza taldeak guraso bilera deitu du urriaren 1ean, 19:30ean, udaletxeko areto nagusian. Bertan, besteak beste, denboraldiaren funtzionamenduaz ariko direla aurreratu dute, bai eta lesio edo bestelako ezbeharren aurrean jarraitu beharreko pausuak zein diren ere.
Hargatik, kirol elkarteak “ezinbestekotzat” jo du jendearen parte hartzea “informazio guztia modu zuzenean jasotzeko eta zalantzak bertan argitu ahal izateko”.
