Elizalde eskolak Girizia elkartean hartuko du aterpe
Bertso bazkari autogestionatua egingo dute urriaren 10ean. Txartelak Kabitxo tabernan eskuratu behar dira, bost euroren truke.
Idoia Irazu Haur eta Lehen Hezkuntzako zuzendaria; Ainhoa Otermin DBHko zuzendaria eta David Muñoz, 50. urteurreneko koordinatzaile orokorra. Elizalde Eskola 50. urteurrena handira ospatzen ari da Elizalde Eskola. Ez da horren zalantzarik, dagoeneko dozena bat baino gehiago baitira mende erdia bete dutela ospatzeko egin dituzten jarduerak. Udazkenarekin batera, baina, jakinarazi dute oraindik badutela zer emana, eta euren indarrak urriaren 10erako gordeko dituztela, egun horretan egingo baitute bertso bazkari autogestionatua – 14:00etan izango da–.
Topaketa horrekin Elizaldek bertsogintzarekin eta euskal kulturarekin duen “konpromiso sendoa” erakutsi nahi du: “Gure ikastetxean, bertsolaritza ez da soilik gure tradizioaren parte, baizik eta hizkuntza lantzeko, ahozkotasuna sustatzeko eta ikasleen sormena bultzatzeko tresna pedagogiko ezin hobea da. Hori dela eta, gure mende erdia ospatzeko ere bertsoari toki nabarmena eman nahi izan diogu”.
Txartelak Kabitxo tabernan
Larunbat horretan Jon Maia Zugasti, Sustrai Colina Acordarrementeria, Maddalen Arzallus Antia eta Maialen Lujanbio Zugasti ariko dira kantuan; Amaia Agirre Arrastoa ariko da gidari lanetan.
Bazkaria autogestionatua izango da, baina edaria eta kafea antolakuntzaren esku geratzen direla diote. Egun horretako txartel bakoitzak bost euro balio ditu, eta Kabitxo tabernan eskuratu behar dira horiek.
