Lezoko EAJk salatu du EH Bilduk ez dituela herritarren eskaerak erantzuten
Talde jeltzaleak salatu du herritarrek udalaren erregistro ofizialean aurkeztutako idatzi eta eskaerei ez zaiela "behar bezala" erantzuten.
Lezoko EAJk “kezka” agertu du EH Bilduk Udal Gobernuan duen “kudeaketa egiteko moduagatik”, bai eta “herritarrek beren eskaerak modu formalean udalari helarazten dizkietenean jasotzen duten erantzun faltagatik”.
Diotenez, ez dira iruzkin informalak edota ezarritako bideetatik kanpo egindako eskaerak, “udaleko erregistro ofizialaren bidez aurkeztutako eskaerak”, baizik.
Hori horrela, EAJk dio gobernatzea ez dela soilik udal gobernutik erabakiak hartzea: “Gobernatzea herritarrak entzutea, azalpenak ematea eta herritarren beharrei irtenbideak eskaintzea ere bada. Erantzunik eza ohiko dinamika bihurtzen denean, ez da kasu puntual bat, kudeaketa arazo bat baizik”.
Gurasobakarrei zuzendutako hobari fiskalak aztertzeko eskaria
Aipatutakoaz gain, EAJk oroitarazi du berriki proposatu duela udalak familia gurasobakarrei zuzendutako hobari fiskalak ezartzeko aukera aztertzea, “gizarte ikuspegitik eta familiei laguntzeko neurri garrantzitsua dela iritzita”.
Alabaina, diote ez dutela erantzunik jaso, eta azal dezatela eskatu dute neurri horretan aurrera egiteko prest dauden edo ez, arrazoiak emanaz.
Saldise plazako aferaren gaineko erantzunen zain
Horretaz gain, jeltzaleek salatu dute Saldise plazan bizikidetza ordenantza ez betetzearen inguruan herritarrek egindako kexek ez dutela erantzunik jaso.
Jakinarazi dutenez, herritarrek “baloia baimendutako ordutegietatik kanpo” erabiltzeak sortzen dituen eragozpenak helarazi dituzte, eta “egoera horrek inguruko bizilagunen bizikidetzan eta atsedenaldian eragina du”. Hortaz, talde jeltzaleak defendatu du espazio publikoek haur eta gazteentzat gozatzeko lekuak izan behar dutela, baina “betiere arauak eta bizikidetza errespetatuz”.
“Mantentze lan gehiago”
Azkenik, EAJk gogorarazi du herritarrek mantentze lanen zein garbiketen gaien inguruko “gabeziak” salatu dituztela, eta “bereziki kezkagarritzat” jo du egoera hori gertatzea “EH Bilduren gobernuak jarduera horietarako erabilgarri zuen aurrekontu partida osoa gauzatu ez duen bitartean”. Talde jeltzalearen iritziz, beraz, “arazoa ez da baliabide falta, lehentasun eta kudeaketa falta baizik”.
Finean, Lezoko EAJk EH Bilduko gobernuari eskatu dio “jasotzen dituen idatziei erantzun diezaiela, azalpenak eman ditzala eta lezoarren eskaerei erantzun diezaiela”.
