Miru beltza eta amiamokoa askatuko dituzte Arditurrin
Igandean (urriak 4) askatuko dituzte Basabizi zentroan sendatutako animaliak. 11:00etan izango da hitzordua, eta izena eman behar da aurrez.
'Hegaztiak berriro aske hegan' hitzordu bateko artxiboko irudi bat. Basabizi zentroa Gipuzkoako basa-fauna berreskuratzeaz arduratzen da; animalia zaurituak birgaitzeaz eta sendatzeaz, alegia, berriro ingurune naturalera itzul daitezen.
Sendatutako animaliak askatu egiten dituzte gero, eta hain justu igande honetan (urriak 4) Arditurri parketxean utziko dituzte aske berriz miru beltza eta amiamokoa. Saio horretan aldundiko Basa Animali eta Landareen Zerbitzu teknikariek liberatuko dituzte hegaztiak, baina zenbait azalpen emango dituzte lehenbizi.
Askapeneko hitzordua 11:00etan izango da, eta bertaratzeko ezinbestekoa da izena ematea 943 49 42 48 edota 688 89 50 68 zenbakietara deituta zein mezu elektroniko bat idatzita. Saioa euskaraz eta gaztelaniaz izango da, eta hiru euro ordaindu behar dira pertsonako.
