Industriaguneetako hondakinen kudeaketa udalaren eskumena izango da aurrerantzean
Hondakinak gaika bildu eta birziklatzea da helburu nagusiena, "errefusagatik ahalik eta gutxien ordaintzeko". Horretan lan egiten duten aparteko erakunde publiko bat jardungo da hondakinen biltzean.
Oiartzungo Udalak jakinarazi duenez, urriaren 1etik aurrera udalak egingo du industriaguneetako hondakinen bilketa eta kudeaketa. Orain arte San Markok egiten zuen zerbitzua, baina hemendik aurrera udalak eramango du kudeaketa, finantzen kontrola, industriaguneetako hondakinen tasa eta salmenta.
Partekatu dituzten datuen arabera, 2024an eta 2025ean egindako azterketak ondorioztatu du gaur gaurkoz Oiartzungo industriagunea ez dela iristean %65eko gaikako bilketa egitera, herrigunean %80tik gora biltzen den bitartean. Horregatik, udalak eskumen berriarekin lortu nahi du industriagunean egiten den gaikako bilketa herrigunekoaren adinakoa izatea, eta horrela, diru sarrera gehienak hondakin birziklagarrien salmentatik izatea eta errefusagatik ahalik eta gutxien ordaintzea.
Garbiketa eta hondakinen gaikako bilketa Garbitania Zero Zabor erakunde publikoaren bitartez egingo du udalak, hondakinen gaikako bilketan esperientzia baitu erakundeak. Udala bazkide egin zaio, baina argitu du horrek ez duela eraginik izango oreka ekonomikoan, eta etorkizunean bazkidetza utziz gero, dirua berreskuratuko lukeela udalak.
Udalak azpimarratu du 2025eko azaroan EAJk eta EH Bilduk hitzartu zuten hondakinen kudeaketaren udal akordioa “%100ean bete” dela, adostutako neurri guztiak bete direla argudiatuta. Besteak beste, ziurtatu du papera eta ontzi arinak errafiazko poltsetan ateratzen direla eta etxeko olioa biltzeko sistema eraginkorragoa eta erosoagoa jarri dela.
