Atzerakada eta murrizketarik ez dute onartuko
Pentsio, zaintza eta osasun publiko duinen aldeko borrokan irmo jarraitzeko konpromisoa berretsi du Duintasunak gaur.
Duintasunaren protesta gaur. Pentsio, zaintza eta osasun publiko duinen aldeko borrokan irmo jarraitzeko konpromisoa berretsi du Duintasunak gaur. Oporraldiaren ostean itzuli dira kalera pentsiodun eta erretiratuek. Batzarra eta manifestazioa hasi aurretik, aipamen berezia egin diote Duintasunako ordezkari eta mobilizazioei ahotsa jartzen dien Javier Sanzi; osasun arazo batek ospitalera eraman zuen duela astebete, eta bertan ingresatuta dago, “espero dugu laster hemen izatea, mikrofonoa hartuta, pentsio, zaintza eta osasun publiko duinaren alde lanean”.
Pentsioetan murrizketak ezartzeko erabiltzen dituzten arrazoiei aipamena lehenik pentsiodun eta erretiratuek gaurko protestan: pentsioen sistema publikoaren egoera jasanezina dela, langileen eta pentsiodunen arteko proportzioa gero eta txikiagoa dela, edota pentsioak soldaten gainetik igotzen ari direla eta pentsiodunek gazteek baino gehiago kobratzen dutela, “horiek guztiak gezurrak dira, gezur eta propaganda kanpaina baten parte, pentsio publikoen sisteman atzerakadak eta murrizketak justifikatzeko eta langileekin, bereziki gazteekin, zatiketa sortzeko”.
Errealitatea, honakoa, salatu dutenez, erosahalmenaren galera nabarmena izango dutela pentsio eta soldatetan, azken hilabeteetan KPI —Kontsumo Prezioen Indizea— igotzen ari delako, “abuztuan %4,3an kokatu da, bitartean gure pentsioa gehienak urtarrilean eguneratu ziren %2,7arekin”. Erosahalmena are eta larriagoa dela gainera, gutxieneko pentsioak dituztenentzat gaineratu dute, “batez ere emakumeentzat”.
Erdigunean ikasturte berrian Lanbidearteko gutxieneko Soldatekin parekatzea pentsioak, mendekotasunaren arretarako zerbitzu publiko eta kalitatezkoak bermatzea, eta osasun sistemaren defentsa, hiru horien bueltan artikulatuko dute pentsiodunek euren borroka.
Anbulatorioen EAG Arreta Etengabeko Guneekin kezka ere Duintasunak. Hor ere, okerrera egin du egoerak eta azaldu dute lanez gainezka direla medikuak oro har Donostialdean, eta bereziki Errenteria-Oreretan, “Etengabeko Arreta Guneetan ez da medikurik asko-askotan, larrialdiak ezin erantzun dira, eta erizainei ez dagozkien lanak egozten dizkiete horretarako prestakuntzarik ez badute ere”. Horrekin lotuta epe laburrean protestara deituko dutela Osasun publikoaren aldeko plataformek jakinarazi dute.
Etxebizitzarako eskubideari ere aipamena gaurko protestan, eta babes osoa pentsiodun eta erretiratuen elkartetik haren aldeko protesta guztiei. Horrekin lotuta, gaur 19:00etan Herriko Plazan deitua dagoen Etxebizitza Duinaren aldeko elkarretaratzean parte hartzera deitu du Duintasunak; Oarsoaldeko Ernai gazte antolakundea da deitzailea.
Batzarra bukatuta, herriko kaleetan barrena manifestazioa egin dute pentsiodunek.
