Datorren asteazkenean ekingo dio udalak auzo batzarrak egiteari
Hilaren 14tik azaroaren 9ra izango dira auzoetako hitzorduak. Lehena Arragua izango da, eta jarraian Karrika.
Oiartzungo Udalak jakinarazi duenaren arabera, udal zinegotziek egingo dituzten auzo batzarrak hilaren 14tik azaroaren 9ra izango dira. Hortaz, datorren asteazkenean ekingo diote bilera errondari.
Topaketa horietan 2026an egindakoak azaltzeaz gain, legegintzaldi amaierako egitekoak aurkeztu eta auzotarren eskaerak zein proposamenak bilduko dituzte: “Auzoetara joango gara auzoez hitz egitera, eta auzotar guztiak batzarretan parte hartzera gonbidatu nahi ditugu”, diote Joana Mendiburu Garaiar alkateak eta Agustin Lekuona Irastorza zein Garazi Urdampilleta Astibiak.
Hitzorduak 18:00etan hasiko dira, eta ordu eta erdiko iraupena izango dutela aurreikusi dute udalean. Era berean, diote Arraguan eta Altzibarren itzulpen zerbitzua egongo dela euskaratik gaztelaniara, eta Ugaldetxon, berriz, zeinu hizkuntzako interpretea egongo dela.
Auzo batzarren egutegia
- Hilak 14: Arragua, elizan (itzulpen zerbitzua: euskara-gaztelania)
- Hilak 19: Karrika, Artaso elkartean
- Hilak 21: Elizalde, udaletxeko areto nagusian
- Hilak 22: Iturriotz, auzo lokalean (Beko Soro parean)
- Hilak 26: Ergoien, Auzokalte elkartean
- Azaroak 2: Ugaldetxo, auzo lokalean (Atamitxen)
- Azaroak 5: Altzibar, auzo lokalean (Eroskiren ondoan)
- Azaroak 9: Gurutze, Bizardia elkartea
