'Zazpi jauzi eguna' antolatu du Oiartzungo Gure Eskuk
Hilaren 11n egun osoko egitaraua izango da Oiartzunen. Programazio hori hilaren 25eko 'Zazpi jauziz, herri bat' dinamikaren atarikoa da.
Oiartzungo Gure Eskuren artxiboko irudia. Gure Eskuk Zazpi jauziz, herri bat dinamika egingo du hilaren 25ean (igandea da) Euskal Herriko zazpi hiriburuetan ideia hauek zabaldu asmoz: euskal nazioaren aitortzan jauzi bat behar dela, Euskal Herriko lurraldeen arteko kohesioan jauzia behar dela, euskararen normalizazioan jauzi bat behar dela, eta, azkenik, burujabetza osoaren bidean ere jauzi bat behar dela.
Ildo horretatik, Oiartzungo Gure Eskuk Zazpi jauzi eguna egingo du hilaren 11n (igandea da) herrian bertan, eta egun osoko egitaraua antolatu dute horretarako. Eguerdiko hamabietan muxikoak egingo dituzte Iturriotzen Oinkada taldearekin, eta ondoren kalejira egingo dute Madalensorora. Han bazkaria egingo dute, eta Biok-en menua dastatzeko aukera izango dute bertaratutakoek –kartoffelsuppe (porru patata antzeko bat haragiarekin), txerri masailak garagardo beltzean patata purearekin eta apfelstrudel–. Menu beganoa ere izango da –kartoffelsuppe haragirik gabe, bratwrust beganoa tipula potxatuarekin eta chukruta, eta apfelstrudel beganoa–. Txartelak 18 euroren truke erosi behar dira Biok-en bertan, Kastron edota Arkaitzan, hilaren 8a baino lehen.
Azkenik, egunari amaiera emateko 17:00etan 7 jauzi entrenamendua eta hilaren 25erako bideoaren grabaketa egingo dituzte. Egun horretan Tripontzia eta Gure Eskuren materiala eskuratzeko aukera egongo dela aurreratu dute.
Gure Eskuk Zazpi jauziz, herri bat dinamika aurkezteko bideo bat egin du:
