Etxebizitza Bulegoa izango dute eskura Oarsoaldeko biztanleek
Etxebizitzaren gaiarekin lotutako informazioa, orientazioa eta izapideetarako laguntza eskainiko du zerbitzu ibiltari berriak.
Aitziber Zinkunegi, Etxebizitza Bulegoaren teknikaria. Etxebizitza Bulegoa jarriko dute martxan Errenteriako, Lezoko, Oiartzungo eta Pasaiako Udalek Oarsoaldea Garapen Agentziarekin elkarlanean. Hala jakinarazi du berriki garapen agentziak, eta nabarmendu, era berean, zerbitzu ibiltaria izango dela.
Eskaintza horrekin lau herrietako biztanleei etxebizitzaren arloko informazioa, orientazioa eta izapideetarako laguntza “modu irisgarri, gertuko eta bateratuan” eskaini nahi diete, jakin badakitelako “etxebizitza herritarren kezka nagusietako bat” bihurtu dela, “bereziki gazteen eta egoera zaurgarrian dauden pertsonen artean”.
Aipatutakoaz gain, jakinarazi dute bulegoko profesionalek norbanako bakoitzaren egoerak eta beharrak aztertuko dituztela “eskura dituzten aukerak azaldu eta jarraitu beharreko urratsen inguruko orientazioa emateko”.
Herritar guztiei zuzendutako zerbitzua
Hamaika gai landuko dituzte Etxebizitza Bulegoan; tartean, honakoak: Etxebide, Alokabide, Bizigune eta ASAP programak; Gaztelagun eta Emantzipa programak; babes publikoko eta udal etxebizitza tasatuak; alokairu publikoa eta pribatua, erabilera turistikoko etxebizitzen araudia…
Zerbitzua eskualdeko herritar guztientzat egongo da zabalik, eta babes ofizialeko etxebizitza bat erosi, saldu edo alokatu nahi dutenek, etxejabeek zein maizterrek, diru laguntza, programa edo izapideei buruzko informazioa behar dutenek edota etxebizitzarekin lotutako zalantza edo arazoren bat dutenek erabili ahal izango dute.
Zerbitzuarekin harremanetan jartzeko 943 34 41 60 zenbakira deitu edota mezu elektroniko bat idatzi behar da. Eskaerak, bestalde, formulario honen bidez ere egin daitezke.
Hitzordua aldez aurretik eskatu behar da, eta kontuan izan behar da arreta ordutegia 09:00etatik 14:00etara izango dela.
Arreta gunearen informazioa
Etxebizitza Bulegoak astelehenetik ostiralera emango du zerbitzua, eta egun bakoitzean herri ezberdin batean izango da:
- Errenteria: astelehen eta asteazkenetan. Madalen Kalea 3.
- Oiartzun: asteartea. Doneztebe plaza 1.
- Lezo: osteguna. Lezoko Udala, Gurutze Santuaren Plaza 1.
- Pasaia: ostirala. Euskadi etorbidea, merkatuko eraikina.
