Gau Beltza, ate joka
Hileko azken egunean ospatzen da Gau Beltza, baina egun horren aurretik zenbait prestaketa jardunaldi izango dituzte Oiartzunen Abaraxkaren eskutik.
Gau Beltzaren harira, zenbait jarduera antolatu ditu Abaraxka ludotekak, eta bihar (hilak 9) izango da horietan lehena. Zehazki, 17:00etan hasita lau urtetik gorakoei zuzendutako ipuin saioa izango da liburutegian, eta larunbatean (hilak 10), berriz, apaingarri tailerra egingo dute Abaraxkan bertan, 16:30ean. Ludotekan izanagatik ere, herritar guztiei zuzendutako jarduera izango dela aurreratu dute.
Hurrengo topaketa hilaren 14an izango da, eta egun horretan heriotza perinatalaren herri argazkia aterako dute 18:30ean Doneztebe plazan. Jarraian pleno aretoan, Herioz mintzo: Argi Izpien Aukerak liburuan oinarrituta, heriotzaren inguruko solasaldia egingo du Itsaso Garzonek –azken hau helduei bideratutako saioa da–.
Horretaz gain, hilaren 17an Lehen Hezkuntzako haurrei zuzendutako kandelen inguruko istorioak kontatuko dituzte Iturriotzeko dorretxean, eta hilaren 24an, berriz, mozorro tailerra eta kluedoa zein janari beldurgarri saioa izango dituzte. Mozorro ikastaroa 16:30ean izango da, Arabaraxkan, eta gainerako jarduerak, haatik, 17:00etan hasiko dira, Topalekuan.
Jardunaldiei amaiera emateko, hilaren 30ean kalabaza huste saioa egingo dute Abaraxkan 17:00etan hasita, eta hileko azken egunean Gau Beltza ospatuko dute, 19:30ean Doneztebe plazatik abiatuta.
