Bertso bazkari autogestionatua berriro noiz antolatu zain
Elizalde Eskolak 50. urteurrena antolatzeko bertso bazkaria egin zuen larunbatean, eta hitzorduaren arrakasta nabarmendu dute antolatzaileek.
Elizalde Eskolarentzat urte berezia izaten ari denaren zalantzarik ez dago. 50. urteurrena ospatzen ari dira, eta ikasturte hasieratik dozenaka ekitaldi eta jarduera egiten dabiltza, horrelako efemerideak ez baitira maiz ospatzen.
Jarduera sorta horietan azkena larunbatean egin zuten; bertso bazkari autogestionatua egin zuten Girizia elkartean, eta “giro ezin hobean” murgildu zirela kontatu dute: “Elkarteak eskaintzen duen goxotasunean, 50 pertsona inguru bildu ziren euskal kulturaz eta bertsolaritzaz gozatzeko, eskolak ahozko tradizioarekin duen konpromisoa berretsiz”.
Ekitaldiari hasiera emateaz Aira, Jule, Ur eta Gille bertso eskolan aurten hasitako ikasleak arduratu ziren, eta gero Andoni Egaña, Maddalen Arzallus eta Jon Maia Soriaren txanda izan zen.
Maiak, esaterako, garai hartako guraso erdaldunek euskararen alde egin zuten ahalegina gogoratu zuen Zamoratikan etorri eta nahi zuenez euskaldundu, gau-eskoletan hasi zen aita, gure hizkuntza helburu abestuz, eta, noski, gurasoei eskerrak emanez.
Arzallusek, berriz, eskolaren beraren izena goraipatu zuen: Segi sustatzen Herri Eskola inklusibo, publikoa.
Balorazio “ezin hobea”
Antolatzaileek jardueraren balorazio positiboa egin dute: “Autokudeaketaren formatuak funtzionatu dezakeela ikusi da, eta Girizia elkarteak eskainitako gertutasunak lagundu du saioa berezia izan dadin”.
Era berean, nabarmendu dute bertaratutako pertsonek adierazi dutela “asko gozatu” zutela, eta hurrengo urterako gogoz daudela. “Arrakasta ikusita, etorkizunean errepikatzeko moduko egitasmoa dela ondorioztatu da”, diote
