Aitortzatik harago doazen jardunaldiak
Ekuatorea pasa dute Luis Goya zinema ekoizle eta zuzendariaren obra eta figura goresteko Lezon egiten ari diren jardunaldiek, 'Luis Goyaren ondarea' jardunaldiek, alegia.
Lotura Fims-eko Miren Berasategi eta Aitor Etxebeste, gaur, Lezo Herri Eskolako ikasleekin egindako saioan. Ekuatorea pasa dute Luis Goya zinema ekoizle eta zuzendariaren obra eta figura goresteko Lezon egiten ari diren jardunaldiek, Luis Goyaren ondarea jardunaldiek, alegia. Lezoko Zinema Ttikiak antolatu ditu, Lezoko Udalaren babesarekin eta Euskal Filmategiaren laguntzarekin. Orain arteko ekitaldietan nabarmen gelditu da Goyaren aitortza ekitaldiak izanik ere, harago doala egitasmoa: haren obra, egiteko era, figura, eta konpromisoari balioa emateko egunak dituzte Lezon.
Astearteko lehen egunean Ke arteko egunak filmaren emanaldia eta ondorengo solasaldia egin ziren Gezala Auditoriumean; atzo (asteazkena), berriz, Euskaldunon Goya dokumentalarena izan zen Lezoko antzokiko pantaila, ondorengo solasaldiak lagunduta. Gaur goizean (osteguna) Lezo Herri Eskolako ikasleek Kalabaza tripontzia filma ikusi, eta animazio film bat egiteak dakarren lana ezagutu dute Lotura Fims-eko Miren Berasategiren eta Aitor Etxebesteren eskutik,; astelehenean berriz ere egingo dute Lezora bisita Loturako bi kideek, Pasaia-Lezo Lizeoko ikasleekin izateko.
Urtzi Urkizu, atzo, ‘Euskaldunon Goya’ dokumentalaren emanaldiaren ondorego solasaldian.
Berezia izan zen atzoko Euskaldunon Goya-ren emanaldia. Batetik, Urtzi Urkizu egileetako batek emanaldiaren ondorengo solasaldian 2016an egindako lanaren nondik-norakoen berri eman zuen; Goya hil eta hamar urtera sortu zuten dokumentala Urkizuk eta Lara Madinabeitiak Zurriolako Butaka Donostiako Zinemaldiko euskarazko hedabideen arteko saio komunitariorako; ondorenera Berria Telebistan eta Hamaika Telebistan ere eman zuten 30 minutu pasatxoko lana. Lezon estreinatu zen, ordea, Luis Goyak egindakoak biltzen dituen ikus-entzunezkoa, haren lagun eta hurbilekoen testigantzekin, zeinetan lezoarraren izaeraren berri ere ematen den.
Solasaldian ideia bat nabarmendu zuen Urkizuk: euskarazko euskal zinema Jaizkibelen magalean sortu zela, hori argudiatzeko ideia nagusia Kalabaza tripontzia (Jaizkibel ekoiztetxea, 1985) lana izanik: euskara hutsean egin zen lehen film luzea (animazio lana da) izan zen Juanba Berasategiren ekipoak sortutakoa, Koldo Izagirreren gidoi, eta Goyaren produkzio lanarekin; 1989ko Ke arteko egunak (1989), bestalde, Donostiako Zinemaldiko sail ofizialean lehian izan zen lehen euskarazko lana izan zen; Antxon Ezeizak zuzendu zuen hura, Goyaren produkziopean.
Alta, atzoko unerik hunkigarriena Goyaren kuadrillakide izandako Antton Leundak ekarri zuen Gezalara. 2006ko irailean hil zen Goya, eta orduko hartan egin ziren aitortza ekitaldietarako prestatu zituen bertsoak kantatu zituen. Beheko bideoan ikus daiteke Leundaren ekarpenaren zati bat.
