Kiru-Do kluba karatea sustatzen ari da Pasaian
Kiru-Do 2019an Pasaian sortutako karate kluba da. Egun 120 pertsona ari dira karateari ahotsa ematen herrian. Hilaren 17an Euskadiko Txapelketan izan ziren, eta bost domina lortu zituzten.
Karatea ez da kirol mediatiko bat. Zaila izaten da kirol horren gaineko informazioa jasotzea, baina Pasaian karatea sustatzen eta kirol horri ahotsa ematen ari den klub bat dago: Kiru-Do Karate Kluba. Kiru-Do 2019an Pasaian sortutako kluba da. Carlos Rodriguez entrenatzailea da proiektuaren arima. Rodriguezek 35 urte daramatza karate klaseak ematen. Hasieran Donostian bideratzen zuen eguneroko jarduna, baina 2019an Pasaian sortu zuen Kiru-Do. Paula Rodriguez da klubaren egungo lehendakaria eta Monica Camarero kirolarietako bat. Biekin bildu da HITZA, eta aitortu dute Kiru-Do Rodriguezen ametsa dela.
Txikitik hasi zen proiektuak dimentsio erraldoia hartu du, kluba asko hazi baita azken urteetan. Kirolariak, teknikariak eta klubeko kideak aintzat hartuta, 120 pertsona inguru ari dira astero karatea egiten Pasaian. Klubaren hastapenetan, helburua karatearen balioak gizarteratzea zela adierazi du Rodriguezek. Horien artean diziplina, kontzentrazioa, errespetua eta segurtasuna aipatu ditu klubeko lehendakariak. Kirol bat izateaz gain, karatea bizitzeko modu bat da Kiru-Doko kideentzat, eta haien asmoa da hori transmititzea. Hasierako helburuak bete egin dituzte, eta hazten ari direla baietsi du Rodriguezek. 120 kirolarien artean maila bikaina duten karatekak dituzte, eta asko nazioartean aritutakoak dira. Kluba «anbiziotsua» dela nabarmendu du lehendakariak, eta asmoa da «gehiago haztea eta nazioartean maizago egotea».
Kiru-Don Shito-ryu izeneko metodoa jarraitzen dute. Shito-ryu Kenwa Mabunik Japonian sortutako karate estiloa da. Estilo horren barruan kata eta kumite izeneko modalitateak daude, eta biak lantzen dituzte Pasaian. Kata mugimendu teknikoen sekuentzia koreografiatua da, eta kumitea karateko borroka modalitatea. Kiru-Don bost urtetik gorako pertsonak aterpetzen dituzte, eta horiek haur (5-8 urte), gazte (9-12 eta 13-15 urte) eta senior (16 urtetik aurrera) taldeetan banatzen dituzte. Klubean, gainera, hainbat programa dituzte: Harrobiko programan hasi berriak eta nabarmentzen hasi diren kirolariak dituzte; Errendimendu handiko programan emaitzetan zentratzen diren karatekak teknifikatzen dituzte; eta Parakarate programan karate egokituan murgiltzen dira. Aurtengo ikasturtean, gainera, beste lerro bat ireki dute, eta defentsa pertsonaleko klaseak egiten dituzte.
Kiru-Dok Pasaian bideratzen du eguneroko jarduna, San Pedroko Udal Gimnasioan eta Trintxerpeko Karmengo Ama ikastetxearen gimnasioan hain zuzen. Eskolak astelehenetik ostiralera bitartean izaten dira, arratsaldez, 17:30etik aurrera.
Txapelketak
Eguneroko prestaketa txapelketetara ere eramaten dute. Berriki Euskadiko Karate Txapelketan izan da Kiru-Do, 14 kirolarirekin parte hartzen. Txapelketa hori Pasaian jokatu da lehen aldiz, Donibaneko Larrabide kiroldegiak jaso baitzituen borrokaldiak hilaren 17an. Klubeko kideak pozarren dira Euskadikoan lortutakoarekin, bost domina zintzilikatu baitzituzten, helburuak guztiz betez: Ainara Royo kadeteak eta Arane Jauregi juniorrak urrea katan; Monica Camarero seniorrak zilarra 61kg baino gutxiagoko kumitean; eta Ana Chavez seniorrak 68kg baino gehiagoko kumitean eta Naiara Enriquez juniorrak katan brontzea.
Klubeko bost dominak emakumeek lortu zituzten, eta Euskadiko Karate Txapelketako parte hartzaileen %48,3 emakumeak izan ziren, emakumeen karatea sendotzen eta handitzen ari den seinale. Kiru-Don eta karatean orokorrean geroz eta emakume gehiago daudela baietsi dute Rodriguezek eta Camarerok: «Hasieran mutil gehiago zeuden, baina orain asko parekatu da dena. Helduen gelan, adibidez, neska gehiago gara. Igoera nabarmena izaten ari da».
Euskadikoa jokatuta, erronka berriak dituzte orain jomugan Kiru-Doko kirolariek. Azaroaren 22an, Gipuzkoako Txapelketa jokatuko dute, eta hil bereko 29an, Espainiakoa. Abenduan, gainera, kluben arteko Espainiako Ligan izango da Kiru-Do, estatuko klub onenen artean baitago Pasaiako taldea.
Karatea bizirik dago Pasaian, eta Kiru-Dok kirol hori hauspotzen eta bultzatzen jarraitu nahi du. Klubak herritarrei dei egin die haiengana gerturatu eta karatea proba dezatela.
