Joana Mendiburu Garaiar ez da EH Bilduren alkategai izango
Sare sozialen bidez eman du erabakiaren berri, baina jakinarazi du EH Bilduren mahai politikoak baduela hautagaia, eta horrek "poza eta lasaitasuna" ematen dizkiola.
Joana Mendiburu Garaiar Oiartzungo alkateak sare sozialen bidez iragarri du erabakia hartuta duela, eta 2027ko udal hauteskundeetan ez dela EH Bilduren alkategai izango.
Instagrameko argitalpen batean eman du horren berri, eta azpimarratu du “pozik eta lasai” dagoela eta egitekoak eginda emango duela pausua atzera, “helburuak beteta”, alegia.
Era berean, gehitu du “esandakoa” egin dutela “planifikazio handiz eta fin lan eginez”, eta aurreratu du beste hainbat proiektu “bideratuta” utziko dituztela datorren legegintzaldirako.
Badago hautagaia
Horretaz gain, Mendiburuk aurreratu du mahai politikoak baduela hautagai bat, eta hori jakiteak “lasaitasuna” ematen diola. “Energiaz beteta” esango du agur alkateak, baina “EH Bildutik Oiartzunen alde lanean jarraitzeko gogoz” betiere.
Honela dio sare sozialetan argitaratu duen oharrak: “2023an Oiartzun bizi, euskaldun, jasangarri eta berdinzalea hartu genuen helburu, eta horretarako, lau urterako lan lerroak eta ekintzak definitu. Planifikazio handiz eta fin lan eginez, ia denak burutuko ditugu 2027ko maiatzerako, eta hainbat bideratuta utziko ditugu hurrengo legegintzaldirako”.
Honela amaitu du: “Urte ederrak bezain intentsuak izan dira. Bihotzean gordeko ditut hainbat momentu eder eta hunkigarri. Bidelagun zoragarriak izan ditut ondoan, baita udal langile onak ere. Elkarrekin egin dugu legegintzaldi hasieran trazatutako bidea “.
