Haizearen kontra ibiltzea, hautu bat denean
Kulturgintzaren eredu berrien inguruan hausnartuko dute aurtengo Hitzen Lihoa literatur zikloan. Azaroaren 13tik 15era egingo dute.
Haizearen kontra ibiltzea gogorra eta neketsua da; aldiz, nahita egiterakoan, hautu batean bilakatzen da, hautu politiko bat. Dikotomia hori bera izan dute hizpide Oiartzunen IX. Hitzen Lihoa literatur zikloa antolatzeko. Datorren azaroaren 13tik 15era egingo dute.
Azaroaren 13an, ostiralean, Harkaitz Canok irakurriko duen manifestuarekin emango diote hasiera jardunaldiari, baina larunbatean izango da hausnarketa mardulerako tartea.
Azken urteetan euskal musikaren arloan handituz joan den fenomenoa da kontzertu erraldoiena eta horrek ezbaian jarri du kultura eredua. Laburrean, pil-pilean dabilen gaia da, eta hori bera jorratutako dute Oiartzunen. Era berean, kultura herrikoiaren eta garaikidearen arteko dikotomiaz ere hitz egingo dute. Edurne Azkarate, Paul Beitia eta Iratxe Retolaza izango dira hizlariak.
Larunbat gauean kontzertuak izango dira, eta igandean liburuen azoka eta bertso-bazkaria, besteren artean. Jarraian, egitarau osoa:
2026ko Hitzen Lihoaren egitaraua:
Azaroak 13, ostirala:
- 19:00: Harkaitz Canoren manifestua eta Maite Larbururen emanaldia, Landetxen. Gonbidapenak online hartu behar dira.
Azaroak 14, larunbata:
- 10:00-13:00: Haize kontra. Kulturgintzaz gogoetatzeko saio irekia. Maialen Akizu, Edurne Azkarate, Paul Beitia eta Iratxe Retolazarekin, Landetxen. Izen emateko posta elektronikora idatzi behar da, azaroak 12ra arte dago irekita epea.
- Herri kultura vs. kultura garaikidea: eztabaida faltsua?
- Ezkerra eta kulturgintza: zein da da ezkerraren kultur eredua?
- 19:00: Gartxoten kontzertua, Landetxen. Sarrerak online hartu behar dira. Bederatzi euro balio dute.
Azaroak 15, igandea:
- 10:00-13:30: III. Liburu Azoka Ttikia eta Katixa Agirreren Berriz Zentauro liburuaren irakurketa jarraitua, Kontzejupean.
- 14:00: Bertso bazkari literarioa
- 16:00: Bertso saioa, Girizia elkartean. Bertsolariak Maialen Lujanbio, Alaia Martin eta Aitor Servier izango dira, eta gai jartzailea, berriz, Katixa Agirre.
*Iganderako sarrerak erreserbatzeko posta elektronikora idatzi behar da (orokorra hogei euro, langabetua hamabost eta bertso saiorako bakarrik bada, bost).
