Xabier Salillas, Munduko Txapelketara begira
Martxa lasterkari antxotarra hilaren 14tik 22ra bitartean Monakon jokatuko den zortzi eguneko Munduko Txapelketan izango da.
Urte bikaina darama Xabier Salillas martxa lasterkari antxotarrak. Dominaz eta trofeoz betetzen ari da etxeko apalategia. Hilaren 14tik 22ra bitartean urteko erronka nagusiari egingo dio aurre, zortzi eguneko Munduko Txapelketa jokatuko baitu Monakon. 1,4 kilometroko zirkuitu bati buelta gehien ematen dizkion kirolaria izango da modalitateko txapeldun berria. Monakon izatea garaipen bat da Salillasentzat, urte eta erdi baitarama lasterketa prestatzen.
Bidea, baina, gogorra izan da antxotarrarentzat. Garaipen eta podium mordoa lortu baditu ere, gauza asko sakrifikatu behar izan ditu. Munduko Txapelketa zortzi egunez lehiatuko da, eta ordu asko eskaini dizkie entrenamenduei. “Bizitzan aukera gutxi daude Munduko Txapelketa batean egoteko, eta bertan izatea garaipen bat da niretzat”, esan du martxa lasterkariak. Monakon hark lehiatuko du, baina bere bikotekideari esker oneko hitzak helarazi dizkio: “Asko sakrifikatu da niregatik, eta nire eragozpen eta beherakada guztiak sufritu ditu. Lortutako guztia biona da, familia ere ahaztu gabe”.
