

Asteburu txarra Hondarribiko futbol zein eskubaloiko lehen taldeentzat, biek galdu dutelako; eskubaloikoak bigarren postuari eutsi dio, Zarautzen berdindu zuelako. Futboleko Lehen Erregionalekoak, aldiz, garaipena lortu du eta bigarren segitzen du Pasaiarekin berdinduta. Emakumeek berdindu zuten Usurbilekin, kopan.

Txingudi ikastetxeko ikasleek jai giroan ospatu zuten atzo ikasturteko azkenaurreko eguna udako oporraldia hasi aurretik. Literatur Sormena eta Argazki lehiaketak egin zituzten ikasle nagusien artean. Azken Hitza izenpeko aldizkaria ere egin zuten bigarren hezkuntzako ikasleek. Txikienek aldiz, sanmartzialetako alardea irudikatu zuten goizean zehar egindako desfilean. Patioari itzuli-inguruka aritu ziren haur hezkuntzako ikasleak, danbor eta txibilito hotsen erritmoan. Guraso ugari ere bildu zen bertan.

Eraso sexisten aurrean, atera zure bibotea lelopean, eraso sexisten aurkako kanpaina abiatu dute Irungo herritar eta eragile feministek jaietara begira. "Zergatik azken aste hauetan Euskal Herrian ospatutako festa guztietan eraso sexualak izan dira?" salatu dute feministek. Egoera honen aurrean, "biboteak ateratzera gonbidatzen ditugu Irungo eta inguruko guztiak", adierazi dute. Era horretan, "bibotea bilakatuko dugu gure ikur" gaineratu dute.

