Gutuna: "Elkartasun oihua"
Xenpelar Bertso Eskolako helduen taldearen gutuna da honakoa, bertso eskolaren testuinguruan salatutako eraso matxisten inguruan. Herrigintzan, euskaran, bertsozaletasunean, baina batik bat elkartasunean eta berdintasunean oinarritutako harremanak nahi dituztela euren artean adierazi dute, besteak beste, gutun horretan, eta argi adierazi: "Oinarri feminista duen gizartean sinistuta gaude".
Xenpelar Bertso Eskolako helduen taldearen gutuna da honakoa, bertso eskolaren testuinguruan salatutako eraso matxisten inguruan. Herrigintzan, euskaran, bertsozaletasunean, baina batik bat elkartasunean eta berdintasunean oinarritutako harremanak nahi dituztela euren artean adierazi dute, besteak beste, gutun horretan, eta argi adierazi: “Oinarri feminista duen gizartean sinistuta gaude”. Ondokoa, gutuna hitzez hitz:
Doinuak, errimak eta bertsoak osatzea, lantzea izaten da gure ostiraletako hitzordua. Azken egunetako berriek, ordea, guztiz astindu dute gure ingurua, eta minduta, atsekabetuta gaude. Xenpelar Bertso Eskolako helduen taldeko kideok gure elkartasun eta babesik handiena helarazi nahi diegu erasoak salatu dituzten ikaskideei, bai eta bertso eskolako gazte eta familiei ere.
Kezkaz bizi dugu egoera. Eztanda egin digu barruak, hain gertu eta hain gure sentitzen dugun ingurua bortizki kolpatua izan da. Bertso eskolaren kontestuan salatu diren eraso matxistek, lehenik eta behin biktimengan eta ondorioz euren inguruko harreman-sarean izan dituzten edota izango dituzten eragin kaltegarriak ekidinezinak dira. Gizarte mailako arazoa da emakumeen aurkako bortizkeria, sistematikoa eta sakona. Herrigintzan, euskaran, bertsozaletasunean, baina batik bat elkartasunean eta berdintasunean oinarritutako harremanak nahi ditugu gure artean. Oinarri feminista duen gizartean sinisten dugu.
Halaxe abiatu zen Xenpelar Bertso Eskola orain lau hamarkada, Euskal Herriarekiko atxikimendutik. 1987. urtean sortua eta euskalzaletasunak eraginda, parte-hartze eta komunikazio espazio ireki eta askeak antolatu eta aurrera eramanez egin zen aurrera herrigintzan, bertsolaritzaren eta bertsozaletasunaren muinean eragin eta antolaketa sustatuz. Eskolaz gain, Bertsolariya bertso-aldizkariaren berrargitalpenak, bertso-saioak, bertso-paper lehiaketak, Txantxangorri saria, omenaldiak… eta beste hainbat ekimen dira horren lekuko.
Etorkizun hurbilean, zauriak sendatzeak berebiziko garrantzia izango duela uste dugu. Biktimen erreparazioa eta inguruko komunitatearena ezinbestekoak izango dira aurrera egiteko. Xenpelar Bertso Eskolak parte-hartze espazio irekiak eta erabakigune zabalak berreskuratu eta indartu beharko ditu bertsozaletasuna sustatu eta euskalduntasuna elikatzeko. Hori guztia feminismotik, ahalduntzean aurrera egin, emakumeen jendaurreko espazioaren eta erreferentzialtasunaren lanketan aurrerapausoak emanaz.
Saminaren kudeaketa eta komunitatearen erreparazioa egitea ezinbestekoa da. Xenpelar Bertso Eskolako helduen taldea behar gehien dutenen ondoan egongo da, aurrera begira egin behar den bidea elkarrekin egin dezagun.
Errenteria-Oreretako Xenpelar Bertso Eskolako helduen taldea
