Gutuna: "Kilometroak 2023: mila esker guztiei!"
Urriaren 1ean ospatu genuen Kilometroak jaia eta egun horretan eman genion amaiera Kilometroak urteari. Eguraldia lagun, eguna borobila izan zen. Igandean bizi izan genuenarekin oraindik ere hunkituta gaude; hunkituta eta, batez ere, eskertuta.
Lerro hauen bidez, eskerrak eman nahi dizkizuegu igandeko “marea biziaren” parte izan zineten guztiei: oholtzan aritu zineten artistei, kaleak alaitu zenituzten herriko kultur eragileei, egunean gertatutakoa bildu zenuten hedabideei, udal ordezkari eta langileei, kalera atera zineten herritarrei eta beste herrietatik gurera hurbildu zinetenei, hasierako ekitaldian parte hartu zenuten ikasle eta familiei, eta, batez ere, egunean zehar lanean aritu zineten 1.200 lagunei. Zuek gabe Gipuzkoako ikastolen jaiak ez luke zentzurik izango. Guztiei mila esker, bihotz-bihotzez.
Urteak beste hitzordu garrantzitsu batzuk ere utzi dizkigu: aurkezpen ekitaldia, dendaren irekiera, Kilometroak txikia, Egunkariaren itxieraren 20. urteurreneko astea, Euskara batuari gorazarre egiteko giza katea, 12 orduz Erriolan kultur maratoia, Adaxka berriak ikuskizuna, Urmugak jaialdia, ikasle ohien bazkaria… Eta urteroko hitzorduak izanik ere, aurten ukitu berezia izan dute ikastolaren egunak, Madalenetako tabernak, Atlantikaldiak… Horietan parte hartu duzuen guztiei ere, mila-mila esker.
Ekimen horiekin, Ikastola zer den azaldu nahi izan diogu gure komunitateari eta herriari. Ikastola, aurten, inoiz baino gehiago, auzolana izan da, desberdinen arteko elkarlana, helburu komun bat lortzeko; euskara izan da, euskara eta euskal kultura sustatzea; parte hartzea izan da, inplikatzea, ardurak hartzea, eskuzabaltasunez; erabakiak denon artean hartzea izan da, elkarri entzunez eta eztabaidatuz; eskerrak ematea izan da, izan zirelako garelako eta garelako izango direlako; muga administratiboen gainetik, herri bat garela erakustea izan da; herri bizi honi zerbait eskaintzea izan da, hezkuntzatik ere eraikitzen baita herria.
Eta hori guztia elkarrekin egin dugu, auzolanean, Kilometroak jaia auzolan erraldoia delako. Auzolan horrek, ordea, oinarri sendoak behar ditu. Eta gurean, oinarri horiek urte osoan batzordeetan lanean aritu zareten ikastolako langile, familia eta lagunek jarri dituzue. Zuek eraman duzue Erriola itsasoraino; gorabeherekin, bai, baina sendo eta ilusioz. Zuentzat da gure eskerrik sentituena.
Erriolak, uraren gazi-gozoak, gorabeherek eta zubiek josten duten komunitate horrek, jarrai beza emaria izaten!
Itziar Navarro Pikabea, Orereta Ikastola
