Gutuna: "Nolako zura halako ezpala"
Munduko Futbol Txapelketaren harira, telebistaren eta sare sozialen bitartez Espainiaren proiektu politikoa indartzeko eta sendotzeko saiakera betearen gaineko hausnarketa egin du Eusebio Lasa Altunak, lanetik etxerako bueltan autobusez gertatutako hainbat pasadizotan oinarrituta.
Munduko Futbol Txapelketaren harira, telebistaren eta sare sozialen bitartez Espainiaren proiektu politikoa indartzeko eta sendotzeko saiakera betearen gaineko hausnarketa egin du Eusebio Lasa Altunak, lanetik etxerako bueltan autobusez gertatutako hainbat pasadizotan oinarrituta. Gutuna hitzez hitz, hemen:
Egunero egiten dudan bezala, gaur ere 04 autobusa hartu dut Donostiako Antigua auzotik lanetik etxera bueltatzeko. Eguerdiko 13:10 minutu inguruan autobusa Errenteriako Kaputxinoetako biribilgunera iritsi denean, errepidearen zubiaren gainean, pankarta bat erdi jarrita ikusi dut. Bertan oraindik zati bat eskegita zegoen, guztiz ondo jarri gabe. Ikusten zen zatian, berriz, « Freedom for the Basque Country » ageri zen. Pankartaren ondoan bi ertzainek hiru gazte atxikituta zituzten galdeketa egiten. Nire barnera zera pentsatu dut, horra hor lanbideagatik diskriminatu nahi ez ditugun bi « langile » beren lana duintasunez egiten. Gure segurtasuna babesteko neurriak hartzen noski.
Autobusak aurrera jarraitu du eta Iztietako geltokia pasa eta gero Niessen Merkatal Gunearen aurrean dagoen semaforoan geratu da momentu bat. Kasualitatez, bertan geldirik egon den denbora horretan, markataritza gunearen aurrean dagoen pantaila erraldoian, beste iragarkien artean, aukera eduki dut iragarki hau ikusteko “es nuestro momento, a por la segunda estrella, vamos España”. Oraingo honetan burura etorri zaizkit, azken aste hauetan, Munduko Futbol Txapelketaren harira, telebistaren eta sare sozialen bitartez etxeko sukalderaino iristen ari zaizkigun iragarki guztiak Espainiaren proiektu politikoa indartzeko eta sendotzeko, futbolaren aitzakia erabiliz. Ez hori bakarrik. Espainiako Futbol Federazioak zenbait enpresa pribatuekin eraiki dituen publizitate kanpainak oso ondo antolatuta daude Espainiako “proiektu autonomiko-plurinazional” hori normalizatzeko.
Atentzioa eman dit bereziki Movistar enpresak kaleratu duen “Batido” izeneko kanpaina. Bertan, 5 jokalari erreferentzialek parte hartzen dute. Horietatik, arbaso etorkinak dituena lehen lerroan jarri dute espainola izateko modu berria azpimarratuz eta gero euskalduna ipini dute arraunean, galegoa mendiak eskalatzen, katalana sokatik tiraka eta madrildarra artza baten gainean. Hori bai, dena oso modernoa, grabaketa Adimen Artifizialaren laguntzarekin egina dagoelako. Gainera, konturatu naiz hemengo jokalariak, hemengo komunikabideekin elkarrizketak egiten dituenean oso ondo saltzen duela bere parte hartzea Espainiako selekzioarekin, bereziki Gipuzkoako bere klubari erakusten dion maitasuna azpimarratuz eta klub horretan jokatzeak eman dion aukera Mundial honetan parte hartzeko. Gero gainera, bide hori oso eraginkorra eta erosoa da Gipuzkoako klubeko jarraitzaileek Espainiako elastikoa soinean eramateko jokalariaren izena atzealdean jarriz.
Semaforoa berde jarri denean autobusak berriro martxa hartu du eta berehala iritsi naiz Zumardiko geltokira, nire autobus bidaiaren helmugara. Bertan jaitsi ondoren etxera iristeko Herriko Palzatik pasa naiz. Bertatik askotan ibiltzen naiz baino gaur, ibilbide gorabeheratsu honetan, hausnarketarako parada eman dit. Eraikinaren aurrealdean gora begiratu dut eta bertan ikusi dut erdi erdian Espainiako bandera aldamenean Ikurriña eta herriko bandera dituelarik. Niessen merkataritza guneko Espainiako iragarki puntual horrek harrabotsa sortu badu herrian, konturatu naiz Espainiako banderak 12 urte baino gehiago daramala udaletxeko balkoitik zintzilikatua. Kasu honetan, gainera, ez da publizitate iragarki sinple bat. Ez da ere Voxek edo PPk jarri duten bandera. Herriko ordezkari politikoen erabakia izan da. Espainiako legearen inposaketaren aurrean Osoko Bilkurak men egitearen ondorioa izan da. Gero, gainera, harrez gero, udaletxeko argazki horrek erakusten duen inposaketa eta menpekotasuna normalizatzen joan da eta irudi sinboliko eta kultural hori ohikoa bihurtu da Herriko Plazan. Herri mailako egoera politiko horrek kezka sortzen badu ere, gauzak gehiago okertzen dira Madrileko Gorteetan ordezkaritza duten euskal alderdi politikoek daramaten ildoa azpimarratzen badugu. Azken urte hauetan, ohikoak dira Espainia autonomiko-plurinazionalaren aldeko mezuak eskumari eta faxismoari aurre egiteko aitzakia erabiliz. Hau da, Euskal Herriari begirako estrategia soziala eta nazionala finkatu ordez, Espainiaren proiektu autonomiko-plurinazional hori sendotzeko begirada indartzen ari da inongo konplexurik gabe.
Etxeko portaleko atea irekitzen ari nintzela etorri zait burura gauzak ez direla kasualitatez gertatzen. Bereziki gurea bezalako herri txiki eta kolonizatu batean gertatzen diren gauzak. Gainera, testuinguru horretan, orain Munduko Futbol Txapelketa agerian uzten ari da Espainiako proiektu autonomiko- plurinazional hori poliki poliki eta normaltasun osoz inposatzen ari direla sistemako euskal alderdi politikoek asimilazioaren bidetik amore emanez. Hau da, nolako zura halako ezpala.
Eusebio Lasa Altuna, Errenteria-Orereta
