Etenetik
Zerbait. Badaukazu zerbait. Ez dakit nola adierazi, ez dakit zehazten zer den: emozio bat, sentimendu bat, izateko era. Zugan dagoen ala ni naizen. Baina baduzu zerbait, hipnotikoa. Orduak eta orduak minutu bilakatzen zaizkit zure alboan. Beti zaude hor, baita petralduta zauden egun horietan ere. Aski eder. Aski elegante. Beraz, ez egin niri errietarik zugana jotzen badut etenik gabe. Pozik nagoenean zugana. Haserre nagoelako zugana. Norbaitek niri terapia egin diezadan behar badut, zugana. Horregatik diot baduzula zerbait. Berezia. Bestela zergatik uste duzu jotzen dudala hainbeste zugana?
Batzuetan irudipena dut ez duzula ulertzen zurekiko afizio hori. Ez zarela ohartzen zure premiatik eratorritako beldurrek gidatzen nautela. Labur esango dizut. Ez zaitut galdu nahi. Gezurretan ariko nintzateke kontrakorik adieraziko banizu. Argi-oilarren gandor koloretsuen atzetik ailegatu naiz gaur ere Mixintxolako zelaietara, han izango zarelakoan. Zimiko egin dit, ordea, zu galtzeko zorian izan nintzeneko oroitzapenak. Urrats horiek batak bestearen aldamenean ematea kolokan izan zeneko aldi hura. Kaioen irri artean topatu zaitut beste behin. Topaleku bihurtutako lurraren mugan. Eten bilakatutako arroka biluzian. Elkar bereiziko ez gaituzten esperantzaz geratu naiz zuri begira. Etenaren goialdean ñabardura horiz eta zuriz zipriztindutako zelaiak. Etenaren behealdean, zu. Itsaso beldurgarriki urdin eta zabala.
Talaia paregabe horretatik, itsaslabarrak zugan errotzen antzeman ditut, eta pentsatu garai batean, aukera izango balute, hanka bilakatu eta bertatik ihes egiteko baliatuko lituzkeela mendiak. Nik ere izango nuke itzuri egiteko gogoa, apokalipsia iristekotan izan zelako gurera. Belatz gorri baten itzalari segika, ezin konta ahala labar ditut begi parean, Pasai Donibanetik Hondarribira. Horiek guztiak bilakatu ziren proiektu erraldoiaren jomuga. Horregatik diot ia gureak egin zuela. Kaiaren biziberritzerako tresna zelakoan saldu zuten kostaldearen txikizio erabatekoa. Herritar askoren ahalegin izugarriari esker mozorroa kendu, eta agerian gelditu zen neurriz kanpoko Superportua. Eztabaida betean, krak. Krisialdi ekonomiko bortitzak lagundu zion Jaizkibeli bizirik irauten. Krisialdiak eta ordura arte herritarrek egindako erresistentziak.
Belatza atzeman nahian jabetu naiz harkaitz txoriak ere haren hegal gorriak astindu dituela hareharrizko zuloetatik aireratzeko. Eta beleek. Eta saiek. Gogoa bi hankako putreetan jarrita jabetu naiz nigan duzun eragina ez duzula gainerakoengan. Ez behintzat zuloz josi nahi zintuzten haiengan. Hona ekarriko nituzke astean bitan. Zure parean jarri, zure handitasunean txiki senti daitezen. Ez nieke horiei bakarrik errezetatuko itsasoterapia. Lurrak etsai ugari ditu garaiotan, noiz eta lurrak jaten ematea lehentasun izango den garai hauetan. Baztango lagunek hondeamakinen aurrean jarri behar izan zuten Aroztegiko astakeria geldiarazteko. Laster izango dute Iruñean epaiketa. Neurriz kanpoko resort-aren bultzatzaileekin egin dezakegu aproba. Amildegi ertzean jarri, zure laguntzarekin, mundua beste norabide batean bultzatzeko.
