Deseraikitzen
Abuztuak 25. Saldiseko estalpearen neurketa, halako edo holako txosna ekartzea erabakitzeko. Abuztuak 29. Oihalezko etxearen tokia zehazteko bilera, udal langileekin eta zinegotziekin. Irailak 2. Olinpiaden lehen saioa. Musika ekipoa kolokan. Kolpetik negutu zuen. Irailak 5. Lezon errotu zen metalezko makil sorta lonaduna. Irailak 6. Banatzaileak ez ziren etorri, ez zuten banatu. Irailak 7. Banatzaileek edari eskaria ekarri zuten. Guk atondu. Txandalarien formazioa. Irailak 8. Hiltzailearen jolasaren hasiera eta playback txapelketa. Berrehun bat voyeur ikuskizunaz gozatzen. Hiru bikote oholtza gainean. Lotsak ez zien igotzen utzi gainerako herrikideei. Irailak 9. Olinpiaden finala. Lau Katu txaranga. Valentziatik EHra etorritako euskara ikaslea paella egiten maisu. Ur jolasak norberak ekarritako pistolekin. Bingo musikatua. Elektrokela, eta bide batez, erromeria. Irailak 10. Garbiketa. Edari eskaria berritu. Izotzak bete. Irailak 11. Murixkaren entsegu orokorra. Txirbillarekin haur jolasak. Dozenaka ume eta haien gurasoak. Arrakastaz hiltzetik gertu. Irailak 12. Batzuek danborradaren entsegu orokorra. Besteek Barrexerkaren prestaketak. Emanaldian Saldise lepo, astegun buruzuri batean festak hasi aurretik. Saldise lepo 16 urteko langa ozta-ozta gainditutako gazte andanaz. Barreak. Betetasuna. Irailak 13. Txupinazoa. Paretik ezin kendu festa giroa, ilunabarrean afariak eta ondoren danbor zaparrada. Ateri eutsi zion, herritarrek Txoria txori aurrez prestatu gabe abestu arren. Irailak 14. Txirbilla Sound System-en martxa soinean pegatuta. Arrantzale bazkaria tokirik pribilejiatuenean, itzaletan. Barren eta tabarren hustuketa. Arratsaldean, Jaixkipe txaranga. Ondoren, DJ Bull. Hurrengo eguneko zereginen zama, etxera tiratzen zaituen soka bilakatuta. Irailak 15. Baserritarren Eguna. Bertsotarako balio duen bazkaria. Kontzertuetako taldeen afariaren prestaketa. Nogen. Jendetza. Xsakara. Erritmoa. Ez dakizu euskarazko musika gustatzen zaizula Xsakarak euskaraz hezur guztiak dantzan jarri arte. Irailak 16. Dantza txapelketa ala pilota txapelketa? Izotzak eta edari eskaria. Elektrotxorongorekin Goiko plazatik herriko kaleetara. Afariak. Kontzertuak Oiartzungo plazan, Oiartzungoak oholtza gainean, eta txungoenak gu. Izozki saltzaileen bidaiak, izotza izaten jarraitzeko txosna infernu bilakatzean. Irailak 17. Desfilea. Sagardoa eta kostilla. Gitarraren doinuekin jauzi gora, jauzi eskuinera, moztu eta burua makurtu. Etxera. Arratsaldean dantzak. Zezen suzkoa (baten batek azalduko al
dit zergatik ez den suzko zezena?). Berriz ere txupina. Irailak 18. Lana. Desmuntatzearen hasiera. Banatzailea jasotzaile bihurtua. Irailak 19. Jasotzailea berriro. HITZAko zutabearen prestaketa. Irailak 20. Txosna hutsik. Badoa. Badakit irail honetako desmuntatze lanetan azken 8-10 urteetan lagun multzo zabal baten artean ondutakoa deseraikitzeari ekin diogula.
Ez dakit jarraipena emateko beste zutaberik eraiki duten hurrengoek. Aukera izan dute.
Hala izan dadila.
