Eta segi
Galduta. Halaxe ibili naiz azken hilabeteotan. Nork beretik baino besteren begietatik ikusten saiatzen, hari bat josi bitartean galduta.
Azala hautsi izenekoa izan zen lehena. Kalera atera orduko, lehen artikulu hori ikusi zuen pertsona bat hurbildu zitzaidan. Aldizkarian azaltzen zena ni ote nintzen galdetuta, baietz erantzun nion. Segidan irakurri ote zuen bota nionean, ezetz, irakurri berak ez zuela egin esan zidan. Gaztelaniaz aritu ginenez, euskaraz ez zekiela ondorioztatu nuen. Segundo gutxira, eta burumakur, hala aitortu zuen.
Dabilenak ez du jakiten noiz agertuko zaion harrapatuko duen ideia. Beretik baino, besteengandik datorren arnas txikia izan daiteke. Eguneroko harremanetan eraikitako gertakariak, hauspo bihurtuak. Eta horretan saiatzen da. Ikusezinak diruditen ahotsak, edota hotsik ez duten begiradak, irudietan, doinuetan, materialetan edo hitzetan gorpuzten. Gozarazten. Eta ahal dela, jasotzailea probokatzen.
Ez du jakiten ere probokazio horiek nork jasoko dituen. Nork irakurriko dituen bere hitzak. Euskarazko aldizkari edo egunkari batean idazten duenak, halere, jakin badaki irakurleak ezinbesteko baldintza bete behar duela: euskara ulertzeko gutxieneko gaitasuna. Baina, ez da nahikoa. Ohitura eta gogo kontua ere bada. Informazioz eta estimuluz gainezka gabiltzan honetan, etengabeko hautuak egiten ditugulako. Alperrik galdu nahi izaten ez dugun segundo bakoitzarekin gure ohituren algoritmoa osatzen dugulako.
Hortaz, halako batean probokazioan erorita, mozkorraldi on baten ajearen erdian zaudelako edota hego haizeak jota barneko harra mugitu zaizulako, eskuartean duzun euskarazko artikulua irakurtzera iritsi bazara, sorioneku zu!
Eta adi! Ez da papera zuri hitz egiten ari dena. Goiko argazkian dagoen hori da. Beretik harilkatu dituelako inguruan jasotako gertakariak: euskaratik kulturara, lurruntzetik gorpuztera, zaurgarrienen begietatik herritartasunera.
Eutsi ba, eutsi egindako pausu txiki horri. Zureganako bidaia besterik ez da eta. Gogoetak, bizipen txikiak, oroitzapenak, etorkizunerako bidezidorrak, komunitate baten ikuspegiak, edo bakardadean azaleratutako intimitateak, besteen usteko ezinak, norberaren egonezinak, goitik datozen agindu arrotzak, behetik gorako izerdiak, buruhausteak, minak eta pozak, burmuinak astintzeko ezusteko ateraldiak. Denak topatuko dituzu inprimatutako hitzetan.
Azala hautsi izan zen niretzat lehena. Eta segi, oraingoz, azkena. Haria topatu bitartean galduta ibili naiz maiz azken bi urte hauetan. Baina argitaratu den artikulu bakoitzeko irakurleren bat hurbildu zaidanean pozez eta esker onez jaso ditut bueltan etorritako hauspoak.
Eta puntu.
Eta segi.
