Udako folk abestia
Aurreko uda bukaeran Hitza-ren orri honetan hilero nire ondoan idazkide dudan Arantxa Urbek udako kantari buruz idatzi zuen. Uda bakoitzak bere abestia duela zioen, baina joan den urtekoa zein izan zen ez zuen oso garbi. Nik ere ez dakit aurtengo udako abestia zein izango den, egia esan gehiegi ere ez zait axola, baina Hondarribia aldean udako melodia osatuko duten notak eta doinuak erraz aurreikusi ditzakedala uste dut.
Irungo titibilitibiliti doinuek uda hasiera zehaztu digute, eta iraila partean berdintsu amaituko da bertako txilibitu, partxe eta erredobleen zalapartarekin. Hemengo dinbi-danba tiro hotsek urrutiko bonbardaketak ahaztaraziko dizkigute, eta gerra jokoak antzezten ditugun bitartean, hemendik lau mila kilometrora dauden Siriako haurren bizitzaren jokoekin ez gara akordatuko.
Kirolak ere bere udako doinua emango digu. Arratsaldero Tourreko run-run sehaska kantarekin kuluxka goxoa egingo dugu, eta asteburuetako arratsetan itxaferoek eta txarangak arraunlariak banderarekin itzuli direla adieraziko digute: Bat, bi, hiru, lau, bost, sei, zazpi, Hondarbia…
Izango dira blues, folk, bertso eta rock doinuak herria jendez lepo betetzeko. Trikitixa eta buruhandien danbatekoak haurren iji-aja ohiuekin nahastuko dira, eta ziur aski, udako egun sargori batean ez dakit nongo joaldunen zintzarrotsak entzungo ditugu, tokiz eta garaiz kanpo, lurra esnatzeko eskatuz.
Eguzki egunetan autoen zaratak gaztetxoen plisti-plasta estaliko du Puntalean, Kai Zaharrean, Hondartzan eta Kai Berrian. Autoentzat errotondak eta errepideak berritzen diren bitartean, eskualdean bizikletaz ibiltzeko ganorazko aukerarik gabe jarraitzen baitugu. Gure agintariak noizbait konturatuko al dira bizikleten joan-etorri isila motorren burrunba baino askoz melodia ederragoa dela?
Azkenik, pertsonek ere aberastuko dute udako doinu nahasi hau. Baserritar eta arrantzaleen blaga, senegaldarren ahots ozenak, iparralde eta hegoaldeko bisitarien ele anitzak, madrildarren elebakarrak… Eta, noski, elkarrizketa guztiak telefonoen txori kantuez ederki apainduta eta ederki trabatuak entzungo ditugu.
Esan bezala, ez dakit aurtengo udako abestia zein izango den. Baina Hondarribiko udako soinu banda folk abesti bat izango dela badakit, urtero aldaketa gutxi samarrekin errepikatzen den folk kanta bat. Cohen anaien azken filmean dioten bezala, «inoiz ez bada berria izan eta ez bada zahartzen, orduan, folk abestia da».
