Josu Elberdin: “Obra nahiko erritmikoa da”
Gaur abiatuko da Ipar Euskal Herrian Ahotsak, musika koralaren nazioarteko jaialdiren XXIV. ekitaldia. Euskal Herriko Hegoaldeko Herri Elkargoaren laguntzaz, bertako abesbatzak sustatu nahi ditu jaialdiak, haientzako propio sortutako musikaren bidez. Donibane Lohizunen, Askainen, Urrunan eta Ziburun izango dira kontzertuak. Josu Elberdin musikagileak (Pasaia, 1972) etzi Ziburun estreinatuko duten Iaute Iuate lana idatzi du Ainhoako Atsulai koralarentzat. Kontaiguzu nola sortu zitzaizun lan hau konposatzeko aukera? Iaz Tolosako Abesbatzen Lehiaketaren barruan, Atsulai abesbatzako zuzendaria eta bere senarra nirekin harremanetan jarri ziren, Ipar Euskal Herrian egiten dituzten halako ekintzen berri emateko, eta proiektoan parte hartzeko eskatuz. Baiezkoa eman nien, eta urtarrilean elkartu ginen zer nolako obra nahi zuten azaltzeko, berezia zelako. Beraiei interesatzen zitzaiena zen, batetik, ez izatea bakarrik abesbatza baterako lana, baizik eta txalapartaren papera nolabait goraipatzea. Bestetik, Inauterietan oinarritutako zerbait nahi zuten, halako materiala ez zutelako aurkitzen. Iaute Iaute izenburua du lanak, hain zuzen. Beraiek pasatutako testuetan oinarritu ginen. Inauteri desberdinetako testu tipikoak dira. Badaude Tolosakoak izan daitezkeenak, beste batzuk Ipar Euskal Herrikoak… hainbat tokitako testuak. Lehenengo doinua aski ezaguna da eta hori armonizatu egin dut, baina hortik aurrera sortutako musika testu horietan oinarrituta dago, baina musika berria sortuta. Musikalki obra nahiko erritmikoa da. Beren esamolde bat da leloa edo errepika: [...]
Gaur abiatuko da Ipar Euskal Herrian Ahotsak, musika koralaren nazioarteko jaialdiren XXIV. ekitaldia. Euskal Herriko Hegoaldeko Herri Elkargoaren laguntzaz, bertako abesbatzak sustatu nahi ditu jaialdiak, haientzako propio sortutako musikaren bidez. Donibane Lohizunen, Askainen, Urrunan eta Ziburun izango dira kontzertuak. Josu Elberdin musikagileak (Pasaia, 1972) etzi Ziburun estreinatuko duten Iaute Iuate lana idatzi du Ainhoako Atsulai koralarentzat.
Kontaiguzu nola sortu zitzaizun lan hau konposatzeko aukera?
Iaz Tolosako Abesbatzen Lehiaketaren barruan, Atsulai abesbatzako zuzendaria eta bere senarra nirekin harremanetan jarri ziren, Ipar Euskal Herrian egiten dituzten halako ekintzen berri emateko, eta proiektoan parte hartzeko eskatuz. Baiezkoa eman nien, eta urtarrilean elkartu ginen zer nolako obra nahi zuten azaltzeko, berezia zelako. Beraiei interesatzen zitzaiena zen, batetik, ez izatea bakarrik abesbatza baterako lana, baizik eta txalapartaren papera nolabait goraipatzea. Bestetik, Inauterietan oinarritutako zerbait nahi zuten, halako materiala ez zutelako aurkitzen.
Iaute Iaute izenburua du lanak, hain zuzen.
Beraiek pasatutako testuetan oinarritu ginen. Inauteri desberdinetako testu tipikoak dira. Badaude Tolosakoak izan daitezkeenak, beste batzuk Ipar Euskal Herrikoak… hainbat tokitako testuak. Lehenengo doinua aski ezaguna da eta hori armonizatu egin dut, baina hortik aurrera sortutako musika testu horietan oinarrituta dago, baina musika berria sortuta. Musikalki obra nahiko erritmikoa da. Beren esamolde bat da leloa edo errepika: Iaute Iaute xingar eta arrautze. Hasieran abesbatza agertzen da bakarrik, gero txalaparta bakarrik eta hortik aurrera elkarrizketa antzeko zerbait eraiki dugu; batzuk abestu eta besteak erantzun, batera jo eta abestu, azkenean inauterietako doinu hori emanez.
Estreinaldiaren atarian zuk zeuk zein sentsazio dituzu?
Orain dela hiru bat aste beraiekin egoteko aukera izan nuen, eta lana menderatzen dutela ikusi ahal izan nuen. Jendearentzako berria izango da, baina nik entzun dut eta gustura nago.
Urte oparoa izaten ari zara zuretzat. 
Urtarriletik hona hogei lan inguru idatzi ditut, lan oso desberdinak, etxeko abesbatzentzako, estatuko abesbatzentzako, eta baita nazioartekoentzat ere. Amerikarrekin, japoniarrekin,… orain filipinar oso on batzuekin gabiltza hizketan. Horrez gain, aurretik estreinatutako beste lan batzuk ere eskatu dizkidate. Argentinako, Venezuelako, Ameriketako Estatu Batuetako eta beste hainbat tokietako abesbatzak nik idatzitako lanak eskatzen ari dira beren proiektuetarako. Kasu hauetan poza bikoitza da, musika ez delako estreinaldian gelditzen, eta lanek gerora bide bat badutela ikusten ari naizelako.
