700 lagun baino gehiagok egin dute Ibilbide Meatzaria udan
Zerbitzuaren arrakasta ikusita igandeetan ere jarriko dute tren berdearen zerbitzua, 2012ko uda arte. 741 lagunek egin dute aurtengo udan Irungo Ibilbide Meatzaria tren berdearekin, iaz zerbitzua martxan jarri zenean baino ia 600 lagun gehiago. Irugurutzetako labeetarako tren berdeak uztailean eta abuztuan egin ditu bisitak, asteartetik ostegunera; baina aurten izandako arrakastaren ondorioz, igandeetan ere hartu ahalko da meategietako trena, udako zerbitzua abiatzen den arte. 11:30ean abiatuko da Oiassoko kanpoaldetik, igandero, ekaina bitarte. Asteazkenean egin zuten aurtengo udako balantzea, Oiasso museoan. Bertan izan ziren Miguel Angel Paez Irungo Udaleko Sustapen Ekonomikoko eta Ingurumen zinegotzia, Oiasso Erromatar Museoko kudeatzaile Cristina Agirre eta Juan Cruz Alberdi Behemendi Landa Garapenerako Elkarteko ordezkaria. Hirurak pozik agertu ziren udan tren berdeak izandako harrerarekin, eta arrakastaren arrazoietako bat hiru erakundeen arteko elkarlana izan dela esan zuten. Iazko udan egin zuten estreinakoz tren berdearen Ibilbide Meatzaria, Oiasso erromatar museotik abiatzen dena Aiako Harriko meatzetako eta burdina kizkaltzeko labeetako eremua bisitatzeko. Duela urtebete, gutxi gorabehera, joan den udako balantzea egin zuten, eta zerbitzuko arduradunak pozik agertu ziren lortutako emaitzekin. 2010eko udan 162 lagunek hartu zuten Behemendiren trena meategiak ezagutzeko. Iaz pozik bazeuden, aurten, zer esanik ez. «Txartelik ez!» zioen kartela egunero eskegi behar izan zuten, goizez zein arratsaldez. Eskaintza turistikoa [...]
Zerbitzuaren arrakasta ikusita igandeetan ere jarriko dute tren berdearen zerbitzua, 2012ko uda arte.
Ibilbide Meatzariaren harrera ikusirik, ekaina arteko igandeetan abiatuko da trena Oiassotik
741 lagunek egin dute aurtengo udan Irungo Ibilbide Meatzaria tren berdearekin, iaz zerbitzua martxan jarri zenean baino ia 600 lagun gehiago. Irugurutzetako labeetarako tren berdeak uztailean eta abuztuan egin ditu bisitak, asteartetik ostegunera; baina aurten izandako arrakastaren ondorioz, igandeetan ere hartu ahalko da meategietako trena, udako zerbitzua abiatzen den arte. 11:30ean abiatuko da Oiassoko kanpoaldetik, igandero, ekaina bitarte.
Asteazkenean egin zuten aurtengo udako balantzea, Oiasso museoan. Bertan izan ziren Miguel Angel Paez Irungo Udaleko Sustapen Ekonomikoko eta Ingurumen zinegotzia, Oiasso Erromatar Museoko kudeatzaile Cristina Agirre eta Juan Cruz Alberdi Behemendi Landa Garapenerako Elkarteko ordezkaria. Hirurak pozik agertu ziren udan tren berdeak izandako harrerarekin, eta arrakastaren arrazoietako bat hiru erakundeen arteko elkarlana izan dela esan zuten.
Iazko udan egin zuten estreinakoz tren berdearen Ibilbide Meatzaria, Oiasso erromatar museotik abiatzen dena Aiako Harriko meatzetako eta burdina kizkaltzeko labeetako eremua bisitatzeko. Duela urtebete, gutxi gorabehera, joan den udako balantzea egin zuten, eta zerbitzuko arduradunak pozik agertu ziren lortutako emaitzekin. 2010eko udan 162 lagunek hartu zuten Behemendiren trena meategiak ezagutzeko. Iaz pozik bazeuden, aurten, zer esanik ez. «Txartelik ez!» zioen kartela egunero eskegi behar izan zuten, goizez zein arratsaldez.
Eskaintza turistikoa indartu
Ibilbide Meatzaria udalaren, Oiassoren eta Behemendiren ekimena da. Paez zinegotziak elkarlan hori goraipatu zuen herenegun: «Irungo eskaintza turistiko eta kulturala indartzeko lan ona egin da, eta erabiltzaileen datuak esanguratsuak dira, gure erakargarritasun turistikoaren balioa agerian utzi dutelako». Bere ustez, datozen urteetan «Irungo garapen turistikoko gune garrantzitsuenetakoa» izango da, eta Aiako Harriko meategi eremuko ondarea mantentzeko egiten ari diren lanetan jarraitzeko konpromezua hartu zuen.
Sustapen Ekonomikoko ordezkariak datorren urteari begira Irugurutzetan zenbait lan egin dituztela aurreratu zuen. Egun eremua argitzeko erabili behar diren generadoreak kenduko dituzte, behin argi sarea labeetara iristerakoan.
Oiasso museoko kudeatzaile Cristina Agirrek Ibilbide Meatzaria museoaren zabaltze lanen barruan sartzen dela argitu zuen. «Museoaren objetua eraikinetik kanpora zabaltzeko beste modu bat da, formato erakargarrikoa, hilaren amaieran antolatuko dugun FICAB zinemaldia edota abuztuan egin genituen Dies Oiassonis diren bezala». Agirrentzat, formato hauek ezinbestekoak dira museora joateko ohitura ez duen publikoa erakartzeko.
Tendentzia aldaketa
Behemendiren trenak urte dezente daramatza eskualdean ibilbideak egiten (Arditurrikoa Oiartzunen, Erromatar Ibilbidea Irunen, Guadalupeko santutegira Hondarribian…), baina Ibilbide Meatzariak eman dituen datuek erabat harrituta utzi dute Juan Cruz Alberdi elkarteko arduraduna. «Irunen tendentzia aldaketa gertatu da; kontuan izan behar da uztaileko eta abuztuko astegunetan dabilela trena; horrelako datoak duela urte gutxi ezinezkoak ziren. Produktu kulturalekin turismoa erakartzea «oso zaila» dela gehitu zuen Alberdik.
