Behobide hirugarren, lasterketa jendetsuenean
Claudia Behobide hondarribiarrak podiuma zapaltzea lortu zuen herenegun Behobia-Donostia lasterketaren 47. ekitaldian. Hirugarrena izan zen, ordubete, hamalau minutu eta 21 segundoko denborarekin. Gipuzkoako emakume onena izan zen, eta Maria Luisa Irizar Saria jaso zuen. Emakumeen proba, gainera, inoizko azkarrena izan zen. Tirhas Gebre Aunoon etiopiarrak aurreko marka onena 48 segundotan hobetzea lortu zuen: 01:08:07ko marka egin zuen Bulebarreko helmugan. Eta hori azkeneko kilometroetan bost aldiz oka egin zuela…
Iaz bezala, Jon Arozena irundarra izan zen Oarso Bidasoko korrikalari gizonen artean denbora onena egin zuena: 01:03:49. Bosgarrena izan zen sailkapen nagusian, eta gipuzkoar onena izatea lortu zuen. Irundarrak, horrela, bosgarren aldiz eskuratu du Diego Garcia Saria. Abrha Milaw Asefak —etiopiarra bera ere— lortu zuen txapela janztea. Hamabik hartu zuten aurrea lehenengo kilometroetan, eta seigarren kilometroan esan zien agur iheskideei Asefak. Hogei kilometroak betetzeko 1:02:57 denbora egin zuen.
Baina horiek ez ziren lasterketaren protagonista bakarrak izan. Beroak eta haizeak ez zuten hutsik egin. Gainera, inoiz baino lasterkari gehiago izan ziren Behobiako irteeran —19.877—, nahiz eta izena 23.016k eman zuten. Oarso Bidasoko zaleek, gainera, atleta guzti-guztiak txalotu zituzten.
Argazkiak: Iñaki Berrio, Eihartze Aramendia eta Urko Etxebeste
Zenbakia
Xabier Lekue, Trintxerpen.
Patinatzaileak, Pasaiako portuan
Tropela, Trintxerpetik ateratzen
Jon Arozena, Pasaiako portuan
Korrikalariak, antzinako itxurarekin, Trintxerpen
Atleta bat, gurpildun aulkian
1.382
1.382 izan ziren Oarso-Bidasoko korrikalariak herenegun: 483 irundarrak izan ziren; 367 errenteriarrak; 166 hondarribiarrak; 121 pasaitarrak; 104 oiartzuarrak; Lezokoak 72; hendaiarrak 66 eta hiru biriatuarrak. Herriz herri sailkapen guztiak eta argazkiak ikus daitezke oarsobidasoa.hitza.info-n.
Sailkapenak, herriz herri
