Komisaldegian inkomunikatuta jarraitzen du Julen Mujikak
Pasaiako Udaleko Gobernu Taldeak sanjuandarraren eta Oxandabaratzen atxiloketak salatu ditu Julen Mujika sanjuandarrak eta Intza Oxandabaratz baxenafarrak inkomunikatuta jarraitzen dute Baionako komisaldegian. Herenegun goizean atxilotu zituzten biak, ...
Pasaiako Udaleko Gobernu Taldeak sanjuandarraren eta Oxandabaratzen atxiloketak salatu ditu
Julen Mujika sanjuandarrak eta Intza Oxandabaratz baxenafarrak inkomunikatuta jarraitzen dute Baionako komisaldegian. Herenegun goizean atxilotu zituzten biak, 2009an aurkitu eta ustez ETAkoa zen zulo batekin lotura zutelakoan, Laurence Levert epailearen arabera. Zenbait orduz Donibane Garazin biak bizi ziren etxea miatu ondoren eraman zituzten komisaldegira Mujika eta Oxandabaratz.
Zentzu horretan, atxiloketak salatzeko elkarretaratzea eta manifestazioa egin zituzten Donibanen herenegun arratsean. 60 bat lagun bildu ziren bertan. Inkomunikazio aroak jarraitzen duen bitartean mobilizazioekin jarraituko dutela jakinarazi dute Donibaneko Amnistiaren Aldeko Mugimenduko kideek. 19:30ean bilduko dira, Santiago plazan.
Bien bitartean, bi atxiloketak salatzeko Pasaiako Udaleko Gobernu Taldeak hedabideetara prentsa oharra bidali du, atxiloketak salatzeko eta Espainiako nahiz Frantziako estatuei «Euskal Herriko gatazkaren konponbiderako prozesuaren alde» urratsak eman ditzatela eskatzeko.
Atxiloketek «antzinako gaia» izan behar dutela uste dute Gobernu Taldeko kideek, eta «azken hilabeteetako erabaki historikoen ondoren are gehiago. Ulertezina da euskal herritarrak oraindik ere atxilotzea». Horrela, «horrelako ekintzak» prozesuaren «kontrako norabidean» doazela adierazi dute udaleko ordezkariek.
