Kaleratze baten kontra protesta egingo dute igandean
Mari Carmen Marquez errenteriarrak eta bere gurasoek ez dituzte momentu onak bizi. Kutxa Marquezen gurasoek Beraunen duten etxearen jabe egin da enkante batean, eta gurasoak kalean geratzekoak dira. Egoera hori salatzeko Gipuzkoako Stop Desahuciosek, B...
Mari Carmen Marquez errenteriarrak eta bere gurasoek ez dituzte momentu onak bizi. Kutxa Marquezen gurasoek Beraunen duten etxearen jabe egin da enkante batean, eta gurasoak kalean geratzekoak dira. Egoera hori salatzeko Gipuzkoako Stop Desahuciosek, Beraungo Erlontzi emakume elkarteak, Oarso taldeak eta Beraungo bizilagunen elkarteak protestara deitu dute igandean.
Eguerdiko hamabietan Beraungo Pablo Sorozabal plazan izango den azokan ekitaldi informatiboa egingo dute. Auzoan zehar protesta zabaldu ondoren, 12:45ean Kutxaren bulegoaren aurrera joango dira. 15 minutuko elkarretaratzea egingo dute. Herritar guztiei ekimen horretan parte hartzeko deialdia luzatu diete “Mari Carmen eta bere senideei babesa adierazteko”.
Protesta horretan etxebizitza duina aldarrikatu eta Kutxak izan duen jarrera “zorrotza, lukurra eta batzuetan iraingarria” salatuko dute. Izan ere, duela hilabete jarri ziren Kutxarekin harremanetan arazoari irtenbide bat emateko, eta gaur-gaurkoz ez dute erantzunik jaso. Horregatik erabaki dute bai Marquezek eta baita Stop Desahuciosek ere pauso bat gehiago ematea. Beharrezkoa ikusten dute Beraun eta Errenteria-Oreretako biztanleak egoera horretaz jabetzea. Gogorarazi dute “biharko egunean edozeini” gerta dakioken egoera dela.