Alarma gorri guztiak piztu dituzte Real Unionen
Ez dira emaitzak bakarrik. Taldeak ematen duen itxura ere arduratzekoa da. Bigarren Mailara jauzi egiteko borrokan egotetik, Hirugarren Mailara ez erortzeko borrokan sartuta dago bete-betean Real Union, herenegun etxean 1-2 galdu zuelako Ponferradina t...
Ez dira emaitzak bakarrik. Taldeak ematen duen itxura ere arduratzekoa da. Bigarren Mailara jauzi egiteko borrokan egotetik, Hirugarren Mailara ez erortzeko borrokan sartuta dago bete-betean Real Union, herenegun etxean 1-2 galdu zuelako Ponferradina taldearen kontra. Emaitza txarra izanagatik ere, taldeak eman zuen itxura da larriagoa, erreakziorako ahalmenik gabe dagoela dirudielako.
Herenegungo porrotaren ondoren, argi gorri guztiak piztu dituzte Gal aldean. Liga bukatzeko hiru partida falta direnean, promozio postua bi puntura dute irundarrek —Real Sociedad B dago egun postu horretan—, eta jaitsiera zuzena hirura. Ligaren azken zatia amesgaiztoa bihurtzen ari da Roberto Olaberen taldearentzat.
Hasieratik kinka larrian
Unionek ez zuen itxura ona eman Ponferradinaren kontra. Dena alderantziz atera zitzaion, lehen zatiaren bukaeran batez ere. Izan ere, bere atean gola sartu zuen Yurik 43. minutuan, eta golaren ondoren epaileak Santi Santos Uniongo jokalaria kalera bota zuen, protesta egiteagatik: Ponferradinaren golaren aurretik kanpoko jokalari batek baloia eskuz jo zuela esan zuten irundarrek.
Bigarren zatiko 20. minutuan Eneko Romok egin zuen txuri-beltzen gola, penaltiz, eta etxekoak orduan joan ziren partidaren bila. Usteak ustel, ordea. Kanpokoen eraso jokaldi azkar baten ondorioz iritsi zen behin betiko 1-2koa.
Hurrengo partida Mirandesen kontra jokatuko du Unionek, kanpoan. Irabaztea, ia ezinezkoa.
