Jaizkibelgo tontorretara bisita gidatua antolatu du Hondaek biharko
Hondaek, Hondarribiko Ondarearen Aldeko Elkarteak, autoz irteera antolatu du biharko, Jaizkibelgo tontorrera. Erromatarren garaiko geografia erakutsiko dute, eta Saltus Vasconum eremuko xehetasunak azalduko dituzte batez ere. Bisita Mertxe Urteaga arke...
Hondaek, Hondarribiko Ondarearen Aldeko Elkarteak, autoz irteera antolatu du biharko, Jaizkibelgo tontorrera. Erromatarren garaiko geografia erakutsiko dute, eta Saltus Vasconum eremuko xehetasunak azalduko dituzte batez ere.
Bisita Mertxe Urteaga arkeologoak gidatuko du, eta goizeko hamarretan bilduko dira parte hartzaileak Hondarribiko Zumardian.
Hondaeko kideek azaldu dutenez, Plinio idazle erromatarrak, Kantauriko kostaldeko geografia deskribatu zuenean ondorengoa azaldu zuen: «Italiatik hurbilen dagoen kostaldean Hispania Citerior dago, Tarraconensis ere deituta. Pirinioetatik abiatuta, kostaldean ondorengoak daude: barduliarren hiriak, morogoak, Menosca, Vesperies eta Amanoko portua».
Ondarearen alde
Hondae Hondarribiko ondarearen aldeko elkartea duela hilabete aurkeztu zuten. Elkarte berriarekin, Hondarribiko kultura defendatu, aberastu eta babesteaz gain, sustatzea eta zabaltzea dute helburu. Ikastaroak, hitzaldiak, bilerak, mintegiak, tailerrak, bisita gidatuak, argitalpenak eta ikus-entzunezkoak egiten dituzte, besteak beste.
Lehenengo mintegian, Zuloaga Etxean, Pia Alkain Hondarribiko azken 25 urteetako hiri arkeologiaz mintzatu zen. Arkeolan fundazioko kide eta elkarteko bazkide da Alkain, eta 1990eko Euskal Kulturaren Ondare Legea gogorarazi zuen solasaldian.
