Irritxoak marrazten
Irri ñimiñoz beteko da Errenteria-Orereta etzi, Landare elkarteak antolatu duen Irritxoen Egunaren harira. Ezer ez da faltako, zehaztasun txikiena ere zaindu dutelako antolatzaileek. Horretarako, zortzi gunetan banatuta hamaika ekimenekin gozatzeko aukera izango dute bertaratzen diren haurrek bereziki, baina baita haien gurasoek ere. Puzgarriak, jokoak, txokolate jatea, erraldoi eta buruhandiak, dantzaldia… hamaika ekimen, txikienen irritxorik zabalena marrazteko. Inoiz egindako handiena Irritxoen Eguna ekimena ez da berez berria, aurretik, Hernanin, Andoainen eta Tolosan ere egin izan dute. Aurretik egiten zen hura hartu, eta dimentsio erraldoia eman dio, ordea, Landarek, “inoiz haurrentzat antolatu den egunik handiena” egi bihurtzeko. Izan ere, horixe izan da antolatzaileen helburua, haurrentzako festa erraldoia egitea. Horretarako, ordea, urtebeteko lana egin du Errenteria-Oreretako elkarteak, eta berarekin batera 400dik gora boluntario ariko dira haurrentzako egun handi eta ahaztezina antolatzen. Datozen urteari begira, Irritxoen Eguna antolatzeko ardura beste herri batek hartzea, eta horrela, urtez urte txandakatzen joatea da helburua. Zortzi gune erdialdetik hurbil Antolatzaileek zehaztu dutenez, hiru ardatz nagusi izango ditu jaiak: herrikoia, parte hartzailea eta euskalduna izango da. Horrekin batera antolatu dituzten ekitaldi guztiak, bazkaria eta Pirritx, Porrotx eta Marimototx pailazoen emanaldi “berezia” izan ezik, doan izango direla gaineratu dute. Azken horri dagokionez, gainera, “ohikoa” ez dela izango aurreratu dute antolatzaileek, [...]
Irri ñimiñoz beteko da Errenteria-Orereta etzi, Landare elkarteak antolatu duen Irritxoen Egunaren harira. Ezer ez da faltako, zehaztasun txikiena ere zaindu dutelako antolatzaileek.
Horretarako, zortzi gunetan banatuta hamaika ekimenekin gozatzeko aukera izango dute bertaratzen diren haurrek bereziki, baina baita haien gurasoek ere. Puzgarriak, jokoak, txokolate jatea, erraldoi eta buruhandiak, dantzaldia… hamaika ekimen, txikienen irritxorik zabalena marrazteko.
Inoiz egindako handiena
Irritxoen Eguna ekimena ez da berez berria, aurretik, Hernanin, Andoainen eta Tolosan ere egin izan dute. Aurretik egiten zen hura hartu, eta dimentsio erraldoia eman dio, ordea, Landarek, “inoiz haurrentzat antolatu den egunik handiena” egi bihurtzeko. Izan ere, horixe izan da antolatzaileen helburua, haurrentzako festa erraldoia egitea.
Horretarako, ordea, urtebeteko lana egin du Errenteria-Oreretako elkarteak, eta berarekin batera 400dik gora boluntario ariko dira haurrentzako egun handi eta ahaztezina antolatzen.
Datozen urteari begira, Irritxoen Eguna antolatzeko ardura beste herri batek hartzea, eta horrela, urtez urte txandakatzen joatea da helburua.
Zortzi gune erdialdetik hurbil
Antolatzaileek zehaztu dutenez, hiru ardatz nagusi izango ditu jaiak: herrikoia, parte hartzailea eta euskalduna izango da.
Horrekin batera antolatu dituzten ekitaldi guztiak, bazkaria eta Pirritx, Porrotx eta Marimototx pailazoen emanaldi “berezia” izan ezik, doan izango direla gaineratu dute. Azken horri dagokionez, gainera, “ohikoa” ez dela izango aurreratu dute antolatzaileek, eta hiru pailazoek emanaldi “berezia” egingo dutela agindu.
Eguraldia ere hartu dute kontuan egun handirako, eta eguzkiak irri egingo ez balu, eguraldi txarrari aurre egiteko egokituta egongo dira gune guztiak. Zortzi antolatu dituzte guztira, guztiak erdialdean edo handik hurbil: Esmalteria plaza, Xenpelar plaza, Merkatuzar, Gamon Zumardia, Madalena kalea, Xabier Olaskoaga plaza, Herriko Enparantza, eta Galtzarabordako kiroldegia.
Olentzero eta Mari Domingi
Arratsaldeko bostetan hasiko den Pirritx, Porrotx eta Marimototsen ekitaldiaren barruan, gonbidatu bereziak izango dira. Olentzero eta Mari Domingi bereziki etorriko dira Errenteria-Oreretaraino, eguna are magikoagoa bihurtzeko. Gabonetako gutunak jasoko dituzte biek ala biek, bertan bilduko diren haurren amets eta asmo guztiak egi bihurtzen saiatzeko.
Egitaraua
- 1. Gunea: Esmalteria. Irrien Kluba 11:00etatik 20:00ak arte: puzgarriak, jolasak, tailerrak; talogileak; haur kotxeen aparkalekua eta txosna.
- 2. Gunea: Xenpelar plaza. Euskal jolasak; 12:00: Eriz magoa; 16:00: Txan magoa; haur kotxeentzako aparkalekua.
- 3. Gunea: Merkatuzar. Herri bazkaria.
- 4. Gunea: Zumardia. Ohe elastikoak; quad pista; chopper pista; zezen mekanikoa; puzgarriak; 12:00: muxikoak; 16:00: Modestorekin dantzaldia; txokolate jatea; talogileak; txosna.
- 5. Gunea: Madalena kalea. Txotxongiloak; argazki erakusketa; puzgarria; pista amerikarra.
- 6. Gunea: Xabier Olaskoaga plaza. 11:00: zanpantzarrak abiatuko dira bertatik; Irritxoen Egunaren irikiera ekitaldia egingo dute jarraian, eta alkateak Irritxoen Eguneko Alkate Txikia izendatuko du, hitzaldi labur bat eta gero; antzerki bereziaren ondoren, espetxean bere haurrarekin bizi den amaren bizi esperientzia kontatuko dute. Ikuskizun hori 17:00etan errepikatuko da; Txiki Kaia gunean: haurrek doan sartzeko aukera izango dute 45 minutuz bertako zirkuitu babestuan.
- 7. Gunea: Herriko Enparantza. Eskaladari zuzendutako gunea izango da. 11:00etatik 20:00etara: lau goming berezi eta boulderra. Tirolinak, jauziak egiteko eta rapelatzeko aukera izango dute bertan haurrek.
- 8. Gunea: Galtzarabordako kiroldegian. 17:00: Pirritx, Porrotx eta Marimototsen emanaldi mundiala eta berezia.
- Kale animazioa: Herrian zehar: Kale animazioa izango da Errenteria-Oreretako erdialdeko kaleetan egun osoan. Euskal Herriko trikitilariak, buruhandi eta erraldoien bilkura, dultzaineroak, dantzariak, bertsolari eta kantariak.
