Irrigintza Jaia egingo dute igandean Oiartzunen

oarso bidasoko hitza

2012/11/29

Joan den asteko ostiralean aurkeztu zuten Irrigintza Jaia San Pedron

Euskaraz bizi nahi duten herritarrak bildu eta euskaraz gauzatuko den aisia eskaintza hezitzailea, herritarren parte hartzearen bitartez eta auzolanean antolatzea du helburu Oarsoaldeko Irrien Lagunak ekimenak. Horren adibide garbiena Oiartzunen igandean egingo den jaia izango da. Izan ere, Pasaiako, Errenteria-Oreretako, Lezoko eta Oiartzungo Irrien Lagunek egun osoko festa antolatu dute. Elorsoro kiroldegia izango da jaiaren gune nagusiena, baina Oiartzungo kaleetan ere asko nabarituko da Irrien Lagunen konpromisoa, indarra eta lan egiteko gogoa. 11:00etan hasi eta 18:00etan bukatuko dira ekimenak —kontsigna 10:00etan zabalduko dute—. Denetik egongo da. Oarsoaldeko Irrien Lagunen arabera, helburutzat duten dinamika sortzen laguntzeko eta elkar ezagutzen hasteko eskualde mailako jai bat antolatzea egokia iruditu zitzaien. Esan eta egin. Galdu ezingo den festa izango da Oiartzungoa eta. Beheko zerrendan dago egunean zehar zer egongo den, eta nork parte hartuko duen. Irrigintza Jaia. Egitaraua.

10:00-11:00. Kontsigna irekiko da, bazkariak eta trasteak uzteko.

11:00-11:30. Ongietorria. Agurra, bertsolariak, txalapartariak eta bestelakoak izango dira. Gainera, bandoa irakurriko dute, eta jaiaren suziria ere botako dute.

11:30-12:30. Herriko kaleetatik barrena: kalejira koloretsua osatuko da lau herrietako pertsonaiekin, txarangarekin, trikitilariekin eta denen parte hartzearekin.

12:30-13:00. Kantuaren aurkezpena: koreografia ikasi eta denek dantza egingo dute. Gainera, flashmob-aren grabazioa egingo dute.

13:00. Bazkaria: norberak bere etxetik ekarritakoarekin egingo da bazkaria.

13:30-14:30. Haurrentzako tailerrak: marrazkiak, aurpegiak pintatzea eta bestelakoak egingo dituzte bertan parte hartuko dutenek.

14:30-16:00. Haurren ekitaldia: Oarsoaldeko lau herrietako haurrek parte hartze prozesuan landu dutena aurkeztuko dute. Herrietako haur taldeen ekitalditxoak ere izango dira: antzerkia, malabareak, dantza, abesbatza…

16:00-17:00. Familientzako jolasak.

17:00-18:00. MartinBertso DJak musika jarriko du dantza egiteko.

18:00. Agurra.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.