Krisiak baditu alternatibak
Krisiaren aurrean zer egin? Hori da Hondarribiko Gazte Asanbladak bere buruari galdetu diona. Ez dute krisia konponduko, baina alternatibak badaudela argi utzi nahi dute. “Krisi garai hauetan bla, bla, bla… horrela jarrai dezakegu, eta triste eta haserre joan etxera. Azkenaldian asko ikusten dugun gauza da hori, baina, alternatibak, ezkortasuna eta depresioa estalki hartuta, ezkutatu nahi dizkigute”, esan dute gazte asanbladako kideek. Horregatik, ekimena antolatu dute abendurako. Jardunaldien izenburuak argi eta garbi uzten du euren helburua zein den: Krisiaren aurrean alternatibak. Hilabetero gai bat hartuko dute, eta gaiarekin lotutako ekitaldiak antolatuko dituzte. Abendukoak elikadura burujabetzari buruzkoak izango dira. Lehenengo hitzaldia datorren asteartean, hilaren 18an, izango da. Hondarribiko Zuloaga Etxean egingo dute, 18:30etik aurrera. Bertara hiru elkartetako ordezkariak joango dira solasaldia ematera. Alde batetik, EHNE nekazari eta abeltzainen sindikatuko Pedro Alberdik parte hartuko du. Elikadura burujabetza azaltzeko bide orria eramango du Alberdik: ondasunetik, nekazaritza eredutik pasatu, eta merkaturatzeraino. EHNEko teknikariak esan du garrantzitsua dela hiru urrats horiek kontrolatzea, “nekazaritzarako ezinbestekoak diren balibideak nork kontrolatzen dituen ikusteko”. Kontzeptu horien gainean azalpenak eman ondoren, batzarra egingo dute Zuloaga Etxean. Bidasoko hiru baratze taldeetako bitako (Irungo Aldatsa eta Hondarribiko Xixare) ordezkariak batuko dira solasaldira. Xixare taldekoek Amute eta Kosta auzoetan baratze bana lantzen dute. Egitasmoak, [...]
Krisiaren aurrean zer egin? Hori da Hondarribiko Gazte Asanbladak bere buruari galdetu diona. Ez dute krisia konponduko, baina alternatibak badaudela argi utzi nahi dute.
“Krisi garai hauetan bla, bla, bla… horrela jarrai dezakegu, eta triste eta haserre joan etxera. Azkenaldian asko ikusten dugun gauza da hori, baina, alternatibak, ezkortasuna eta depresioa estalki hartuta, ezkutatu nahi dizkigute”, esan dute gazte asanbladako kideek. Horregatik, ekimena antolatu dute abendurako. Jardunaldien izenburuak argi eta garbi uzten du euren helburua zein den: Krisiaren aurrean alternatibak. Hilabetero gai bat hartuko dute, eta gaiarekin lotutako ekitaldiak antolatuko dituzte. Abendukoak elikadura burujabetzari buruzkoak izango dira.
Lehenengo hitzaldia datorren asteartean, hilaren 18an, izango da. Hondarribiko Zuloaga Etxean egingo dute, 18:30etik aurrera. Bertara hiru elkartetako ordezkariak joango dira solasaldia ematera. Alde batetik, EHNE nekazari eta abeltzainen sindikatuko Pedro Alberdik parte hartuko du. Elikadura burujabetza azaltzeko bide orria eramango du Alberdik: ondasunetik, nekazaritza eredutik pasatu, eta merkaturatzeraino. EHNEko teknikariak esan du garrantzitsua dela hiru urrats horiek kontrolatzea, “nekazaritzarako ezinbestekoak diren balibideak nork kontrolatzen dituen ikusteko”.
Kontzeptu horien gainean azalpenak eman ondoren, batzarra egingo dute Zuloaga Etxean. Bidasoko hiru baratze taldeetako bitako (Irungo Aldatsa eta Hondarribiko Xixare) ordezkariak batuko dira solasaldira.
Xixare taldekoek Amute eta Kosta auzoetan baratze bana lantzen dute. Egitasmoak, Hondarribian izanagatik, Irungo, Hendaiako, Pausuko eta Biriatuko ekoizleak ere hartzen ditu bere barruan. Ia 50 lagunek jaten dituzte bertako baratzeetatik ateratzen diren produktuak. 40 barazki motatik gora lantzen dituzte Xixare taldeko kideek.
Aldatsa elkartea, berriz, Lakaxita gaztetxearen barruan sortu zen. Anaka auzoan, bertatik gertu, utzita zegoen lur sail bat eman zieten, jabeek landu ezin zutelako. Ez diete baratzea erabiltzeagatik kobratzen, eta trukean barazkiz betetako saski bana ematen diete jabe diren bi ahizpei, esker onez.
Hurrengo zitak, 20an eta 27an
Astearteko zitaren ondoren, hurrengo hitzordua bi egun beranduago izango da. Abenduaren 20an Irungo Lakaxita gaztetxera mugituko da Hondarribiko Gazte Asanblada, eta bertan iraganean baserrian nola bizitzen ziren kontatu du hizlari batek, eta bere lana aztertuko du. Eztabaidarako tartea izango da. Hori guztia, 19:30etik aurrera.
Handik astebetera, hilaren 27an, ikus-entzunezko ekitaldia egingo dute Muara Kultur Elkartean. Bertan, Gure lurra, gure etorkizuna dokumentala ikusteko aukera izango da. Lana pobrezia eta ezberdintasunen kontra borrokatzen den Bizilur elkarteak eta EHNE sindikatuak berak sustatu dute.
Dokumental horren gai nagusia da elikadura burujabetza, eta Euskal Herrian zein nazioartean (Hego Amerikan zein Ertamerikan, bereziki) horren alde egiten diren borrokak azaltzen dira. Nekazariei zein ekintzaileei ematen diete hitza dokumental horretan, euren esperientzia kontatzeko eta horiek jendartearen artean zabaltzeko.
